ho chuka jo ki muqaddar mein tha darman hona

ho chukā jo ki muqaddar meñ thā darmāñ honā

ab tire haath hai mushkil mirī āsāñ honā

thā jo maqsūm meñ sharminda-e-ehsāñ honā

ġhair ke haath rahā dafn kā sāmāñ honā

husn kā ishq kī vaadī meñ numāyāñ honā

ramz thā din ko sar-e-tūr charāġhāñ honā

lazzat-e-dard-e-jarāhat to mire dil se na pūchh

pahlū-e-zaḳhm meñ lāzim thā namak-dāñ honā

ik qayāmat kā samāñ thā tirā ai sub.h-e-vatan

parda-e-shām-e-ġharībāñ kā numāyāñ honā

ḳhāna-barbādiyāñ har samt se ghere haiñ mujhe

dar-o-dīvār pa likkhā hai bayābāñ honā

imtihāñ-gāh-e-mohabbat meñ na jaane kyā ho

qahr kā sāmnā hai teġh kā uryāñ honā

aa rahī haiñ ye umīdoñ kī sadā.eñ paiham

go safar saḳht hai lekin na hirāsāñ honā

merī turbat bhī banī aisī zamīñ pe 'ālim'

jis kī taqdīr meñ likkhā thā bayābāñ honā

ho chuka jo ki muqaddar mein tha darman hona

ab tere hath hai mushkil meri aasan hona

tha jo maqsum mein sharminda-e-ehsan hona

ghair ke hath raha dafn ka saman hona

husn ka ishq ki wadi mein numayan hona

ramz tha din ko sar-e-tur charaghan hona

lazzat-e-dard-e-jarahat to mere dil se na puchh

pahlu-e-zaKHm mein lazim tha namak-dan hona

ek qayamat ka saman tha tera ai subh-e-watan

parda-e-sham-e-ghariban ka numayan hona

KHana-barbaadiyan har samt se ghere hain mujhe

dar-o-diwar pa likkha hai bayaban hona

imtihan-gah-e-mohabbat mein na jaane kya ho

qahr ka samna hai tegh ka uryan hona

aa rahi hain ye umidon ki sadaen paiham

go safar saKHt hai lekin na hirasan hona

meri turbat bhi bani aisi zamin pe 'alim'

jis ki taqdir mein likkha tha bayaban hona