ho dair ya haram jo uThaun nazar ko main

ho dair yā haram jo uThā.ūñ nazar ko maiñ

dekhūñ ba-qadr-e-zarf tire sang-e-dar ko maiñ

kyoñ hāl-e-dil sunā.ūñ kisī chārāgar ko maiñ

apnā banā chukā huuñ ġham-e-mo'tabar ko maiñ

zauq-e-nigāh azm-e-tajassus kī daad de

tārīkiyoñ meñ DhūñD rahā huuñ sahar ko maiñ

nazzārgī-e-shauq kā e.ajāz al-amāñ

paatā huuñ aaj dil ke muqābil nazar ko maiñ

naqsh-o-nigār-e-zīst ke āsār haiñ ayaañ

kaise chhupā.ūñ parda-e-shab meñ sahar ko maiñ

raat intizār-e-dost qayāmat se kam na thā

hasrat se dekhtā rahā dīvār-o-dar ko maiñ

roz-e-azal kī azmateñ le kar ḳhayāl meñ

tai kar rahā huuñ ziist kī har rahguzar ko maiñ

ai 'dard' pūchhiye na mirī vus.at-e-nigāh

apnī nazar meñ rakhtā huuñ shams-o-qamar ko maiñ

ho dair ya haram jo uThaun nazar ko main

dekhun ba-qadr-e-zarf tere sang-e-dar ko main

kyon haal-e-dil sunaun kisi chaaragar ko main

apna bana chuka hun gham-e-mo'tabar ko main

zauq-e-nigah azm-e-tajassus ki dad de

tarikiyon mein DhunD raha hun sahar ko main

nazzargi-e-shauq ka eajaz al-aman

pata hun aaj dil ke muqabil nazar ko main

naqsh-o-nigar-e-zist ke aasar hain ayan

kaise chhupaun parda-e-shab mein sahar ko main

raat intizar-e-dost qayamat se kam na tha

hasrat se dekhta raha diwar-o-dar ko main

roz-e-azal ki azmaten le kar KHayal mein

tai kar raha hun zist ki har rahguzar ko main

ai 'dard' puchhiye na meri wusat-e-nigah

apni nazar mein rakhta hun shams-o-qamar ko main