ho gae mujhse KHafa sarkar kyon

ho ga.e mujh se ḳhafā sarkār kyoñ

kahne sunñe se hue bezār kyoñ

mubtalā-e-ishq jān-e-zār kyoñ

dil harīs-e-lazzat-e-āzār kyoñ

qat.a kar ke zindagī kī har umiid

pūchhte ho hālat-e-bīmār kyoñ

teġh-e-abrū kar rahī hai qatl-e-ām

ma.arke meñ hājat-e-talvār kyoñ

ġhair-mumkin hai davā-e-dard-e-dil

paa.e sehat ishq kā bīmār kyoñ

utre bahr-e-ishq meñ ḳhanjar ke ghaaT

tālibān-e-abrū-e-ḳhamdār kyoñ

ai zuleḳhā bik ga.e ban kar ġhulām

hazrat-e-yūsuf sar-e-bāzār kyoñ

dozaḳh-o-jannat kā vaa.iz muft meñ

bāñdhte haiñ is qadar tūmār kyoñ

hazrat-e-'mas.ūd' hijr-e-yār meñ

ho ga.ī hai zindagī dushvār kyoñ

ho gae mujh se KHafa sarkar kyon

kahne sunne se hue bezar kyon

mubtala-e-ishq jaan-e-zar kyon

dil haris-e-lazzat-e-azar kyon

qata kar ke zindagi ki har umid

puchhte ho haalat-e-bimar kyon

tegh-e-abru kar rahi hai qatl-e-am

marke mein hajat-e-talwar kyon

ghair-mumkin hai dawa-e-dard-e-dil

pae sehat ishq ka bimar kyon

utre bahr-e-ishq mein KHanjar ke ghaT

taliban-e-abru-e-KHamdar kyon

ai zuleKHa bik gae ban kar ghulam

hazrat-e-yusuf sar-e-bazar kyon

dozaKH-o-jannat ka waiz muft mein

bandhte hain is qadar tumar kyon

hazrat-e-'masud' hijr-e-yar mein

ho gai hai zindagi dushwar kyon