ho gae muztar dekhte hi wo hilti zulfen phirti nazar hum

ho ga.e muztar dekhte hī vo hiltī zulfeñ phirtī nazar ham

dete haiñ dil ik āfat-e-jāñ ko thāme hue hāthoñ se jigar ham

ġhair ko gar vo pyaar kareñge apne lahū meñ hoñge tar ham

Daal hī deñge un ke qadam par kaaT kar apne haath se sar ham

sulh huī to naale khīñche yuuñ karte haiñ sab ko ḳhabar ham

pīTte haiñ siine kā DhiñDhorā dete haiñ dil bār-e-digar ham

aur mileñge chhoḌ na deñge sun ke sadā-e-murġh-e-sahar ham

halqa donoñ haath kā apne Daal rakheñge gird-e-kamar ham

dil ke andar tuur ke uupar chashm-e-sanam meñ ain haram meñ

terī hī sūrat terī hī mūrat pūjne jaa.eñ tujh ko kidhar ham

raaz chhupte to āġhāz achchhā bhed khule to anjām achchhā

misl-e-sikandar bhes badal kar jaate haiñ ban kar nāma-bar ham

andāza go kar hī chuke haiñ aa jaatī hai muTThī meñ ye

aaj magar be-parda kareñge dekheñge patlī sī kamar ham

laate hī kuchh rañg-e-javānī aañkh se yuuñ kiiñ aañkh ne bāteñ

aao dikhā.eñ sab ko ghāteñ sho.abda-gar tum jādūgar ham

kahtī haiñ zulfeñ mushkīñ kas leñ koī jo Daale haath kamar meñ

phail ke so.o Dar kyā tum ko gasht kareñge gird-e-kamar ham

lutf baḌā ho aur mazā ho is ke 'evaz gar aap ko paa.eñ

baiTh ke apne ghar ke andar DhūñDh rahe haiñ yaar kā ghar ham

tum ko nazākat aur ḳhudā de ham ko lazzat aur ḳhudā de

pā.eñche tum chuTkī se uThā lo thāme hue chalte haiñ kamar ham

uThtā joban jhuktī gardan dabtī bāteñ ruktī ghāteñ

haa.e na kyuuñ sau jaañ se fidā hoñ in chāroñ par uTh phir ham

saaya ban kar saath chaleñge saath phireñge saath raheñge

apne ghar meñ ġhair ke dil meñ jaao jidhar tum aa.eñ udhar ham

jald tum uTTho dauḌ ke aao ham ko thāmo ham ko sambhālo

girte haiñ misl-e-ashk zamīñ par uThte haiñ shakl-e-dard-e-jigar ham

sab se chhuḌā kar laa.e uḌā kar kyā na rakheñge dil meñ chhupā kar

rahne basne chalne phirne tum ko ḳhudā kā deñge ghar ham

muñh jo khulegā rañj baḌhegā ham se na bolo ham ko na chheḌo

kāhīda-tan āzurda-jān āshufta-dil ḳhasta-jigar ham

ye to chhapar-khaT chhoTā sā hai pahlū meñ tum so.oge kyūñkar

aao liTā leñ siine par ham tum ko sulā leñ chhātī par ham

rañj gar aayā ho to bhulā de pyaar baḌhā de ham se milā de

un kī nigah se to gir to chuke haiñ jaa.eñ na yārab dil se utar ham

dekh ke un kā joban ubhrā maiñ ne kahā ye maal hai achchhā

bole vo kyā tum luuT hī loge god meñ yuuñ aa jaa.eñ agar ham

Thahrī hai bāham lutf kī baazī pahle jo paa.e jiit usī kī

vasl kī shab hai DhūñDh rahe haiñ dil vo hamārā un kī kamar ham

roz na.e dil laa.eñ kahāñ se aise tohfe paa.eñ kahāñ se

chaaT paḌī hai tum ko diloñ kī lūTne jaa.eñ kis kā ghar ham

ġhair ke bar meñ un ko dekhā ḳhaak meñ jaa.e aisā nazāra

haath meñ kam-baḳht aa nahīñ saktā toḌte varna tār-e-nazar ham

nashv-o-numā paa.ī hai deccan meñ qadr hamārī kyūñkar hogī

ghar kī murġhī daal barābar kis ko dikhā.eñ apnā hunar ham

kyuuñ na kare dīvāna kisī ko sharm kī 'ādat husn kī shoḳhī

ho ga.e 'mā.il' dekh ke maa.il uThtā joban jhuktī nazar ham

ho gae muztar dekhte hi wo hilti zulfen phirti nazar hum

dete hain dil ek aafat-e-jaan ko thame hue hathon se jigar hum

ghair ko gar wo pyar karenge apne lahu mein honge tar hum

Dal hi denge un ke qadam par kaT kar apne hath se sar hum

sulh hui to nale khinche yun karte hain sab ko KHabar hum

piTte hain sine ka DhinDhora dete hain dil bar-e-digar hum

aur milenge chhoD na denge sun ke sada-e-murgh-e-sahar hum

halqa donon hath ka apne Dal rakhenge gird-e-kamar hum

dil ke andar tur ke upar chashm-e-sanam mein ain haram mein

teri hi surat teri hi murat pujne jaen tujh ko kidhar hum

raaz chhupte to aaghaz achchha bhed khule to anjam achchha

misl-e-sikandar bhes badal kar jate hain ban kar nama-bar hum

andaza go kar hi chuke hain aa jati hai muTThi mein ye

aaj magar be-parda karenge dekhenge patli si kamar hum

late hi kuchh rang-e-jawani aankh se yun kin aankh ne baaten

aao dikhaen sab ko ghaten shoabda-gar tum jadugar hum

kahti hain zulfen mushkin kas len koi jo Dale hath kamar mein

phail ke soo Dar kya tum ko gasht karenge gird-e-kamar hum

lutf baDa ho aur maza ho is ke 'ewaz gar aap ko paen

baiTh ke apne ghar ke andar DhunDh rahe hain yar ka ghar hum

tum ko nazakat aur KHuda de hum ko lazzat aur KHuda de

paenche tum chuTki se uTha lo thame hue chalte hain kamar hum

uThta joban jhukti gardan dabti baaten rukti ghaten

hae na kyun sau jaan se fida hon in chaaron par uTh phir hum

saya ban kar sath chalenge sath phirenge sath rahenge

apne ghar mein ghair ke dil mein jao jidhar tum aaen udhar hum

jald tum uTTho dauD ke aao hum ko thamo hum ko sambhaalo

girte hain misl-e-ashk zamin par uThte hain shakl-e-dard-e-jigar hum

sab se chhuDa kar lae uDa kar kya na rakhenge dil mein chhupa kar

rahne basne chalne phirne tum ko KHuda ka denge ghar hum

munh jo khulega ranj baDhega hum se na bolo hum ko na chheDo

kahida-tan aazurda-jaan aashufta-dil KHasta-jigar hum

ye to chhapar-khaT chhoTa sa hai pahlu mein tum sooge kyunkar

aao liTa len sine par hum tum ko sula len chhati par hum

ranj gar aaya ho to bhula de pyar baDha de hum se mila de

un ki nigah se to gir to chuke hain jaen na yarab dil se utar hum

dekh ke un ka joban ubhra main ne kaha ye mal hai achchha

bole wo kya tum luT hi loge god mein yun aa jaen agar hum

Thahri hai baham lutf ki bazi pahle jo pae jit usi ki

wasl ki shab hai DhunDh rahe hain dil wo hamara un ki kamar hum

roz nae dil laen kahan se aise tohfe paen kahan se

chaT paDi hai tum ko dilon ki luTne jaen kis ka ghar hum

ghair ke bar mein un ko dekha KHak mein jae aisa nazara

hath mein kam-baKHt aa nahin sakta toDte warna tar-e-nazar hum

nashw-o-numa pai hai deccan mein qadr hamari kyunkar hogi

ghar ki murghi dal barabar kis ko dikhaen apna hunar hum

kyun na kare diwana kisi ko sharm ki 'adat husn ki shoKHi

ho gae 'mail' dekh ke mail uThta joban jhukti nazar hum