ho gar aise hi meri shakl se bezar bahut

ho gar aise hī mirī shakl se bezār bahut

tum salāmat raho bande ke ḳharīdār bahut

ham-digar jab ḳhafagī aa.ī to jhagḌā kyā hai

tum ko ḳhvāhiñda bahut ham ko tarah-dār bahut

aaj ke rone meñ jī Duub chalā thā lekin

nāla-e-dil ne rakhā mujh ko ḳhabar-dār bahut

shaiḳh mujh ko na Darā gor ke añdhiyāre se

hijr kī kaaTī haiñ maiñ ne to shab-e-tār bahut

dekhiye ab kī tab-e-ishq se kyūñkar biite

ġhālib aayā hai tabī.at pe ye āzār bahut

sach kaho qatl pe kis ke ye kamar bāñdhī hai

in dinoñ haath meñ tum rakhte ho talvār bahut

'qā.em' aatā hai mujhe rahm javānī pe tirī

mar chuke haiñ isī āzār ke bīmār bahut

ho gar aise hi meri shakl se bezar bahut

tum salamat raho bande ke KHaridar bahut

ham-digar jab KHafagi aai to jhagDa kya hai

tum ko KHwahinda bahut hum ko tarah-dar bahut

aaj ke rone mein ji Dub chala tha lekin

nala-e-dil ne rakha mujh ko KHabar-dar bahut

shaiKH mujh ko na Dara gor ke andhiyare se

hijr ki kaTi hain main ne to shab-e-tar bahut

dekhiye ab ki tab-e-ishq se kyunkar bite

ghaalib aaya hai tabiat pe ye aazar bahut

sach kaho qatl pe kis ke ye kamar bandhi hai

in dinon hath mein tum rakhte ho talwar bahut

'qaem' aata hai mujhe rahm jawani pe teri

mar chuke hain isi aazar ke bimar bahut