ho gaya ab to KHayalon ka safar bhi dushwar

ho gayā ab to ḳhayāloñ kā safar bhī dushvār

duur tak raah meñ hai ḳhud mirī shohrat kā ġhubār

apne ḳhvāboñ ko liye ghar se na bāhar niklo

chār-sū shahr meñ hai nāchte sho.aloñ kī qatār

bārhā niiñd se yuuñ chauñk uThā huuñ jaise

mere bistar pe tirī yaad huī hai bedār

maiñ samajhtā huuñ ki ab sirf kutub-ḳhānoñ meñ

muñh zamāne se chhupā.e hue baiThī hai bahār

ruuh ke zaḳhm ubharte haiñ savāloñ kī tarah

maiñ kahīñ terī ḳhudā.ī se na kar duuñ inkār

tez-rau vaqt kī āñdhī meñ kahāñ tak āḳhir

kaam aa.egī umīdoñ kī ye kachchī dīvār

ek sailāb-e-havādis kā nishāñ haiñ 'jāmī'

aur kyā haiñ mire likkhe hue saare ash.ār

ho gaya ab to KHayalon ka safar bhi dushwar

dur tak rah mein hai KHud meri shohrat ka ghubar

apne KHwabon ko liye ghar se na bahar niklo

chaar-su shahr mein hai nachte shoalon ki qatar

barha nind se yun chaunk uTha hun jaise

mere bistar pe teri yaad hui hai bedar

main samajhta hun ki ab sirf kutub-KHanon mein

munh zamane se chhupae hue baiThi hai bahaar

ruh ke zaKHm ubharte hain sawalon ki tarah

main kahin teri KHudai se na kar dun inkar

tez-rau waqt ki aandhi mein kahan tak aaKHir

kaam aaegi umidon ki ye kachchi diwar

ek sailab-e-hawadis ka nishan hain 'jami'

aur kya hain mere likkhe hue sare ashaar