ho ke warafta kahin KHud ko pukara to nahin

ho ke vārafta kahīñ ḳhud ko pukārā to nahīñ

naam jo lab pe hamāre hai tumhārā to nahīñ

ālam-e-tīrah-shabī mujh ko gavārā to nahīñ

maiñ ki ashk-e-sar-e-mizhgāñ huuñ sitārā to nahīñ

vaqt kahte haiñ ki har zaḳhm ko bhar detā hai

vaqt ne merā koī qarz utārā to nahīñ

raushnī ban ke ubharnā nahīñ āsāñ phir bhī

Duub kyā jā.ūñ ki maiñ sub.h kā taarā to nahīñ

ek lamha thā ki ik umr mujhe kyā mālūm

vaqt ḳhud biit gayā maiñ ne guzāra to nahīñ

umr tūfāñ ke thapeḌoñ meñ basar kī lekin

sakinān-e-lab-e-dariyā ko pukārā to nahīñ

raushnī dil meñ nazar aa.e to 'nashtar' socheñ

ahd-e-rafta ne koī naqsh ubhārā to nahīñ

ho ke warafta kahin KHud ko pukara to nahin

nam jo lab pe hamare hai tumhaara to nahin

aalam-e-tirah-shabi mujh ko gawara to nahin

main ki ashk-e-sar-e-mizhgan hun sitara to nahin

waqt kahte hain ki har zaKHm ko bhar deta hai

waqt ne mera koi qarz utara to nahin

raushni ban ke ubharna nahin aasan phir bhi

Dub kya jaun ki main subh ka tara to nahin

ek lamha tha ki ek umr mujhe kya malum

waqt KHud bit gaya main ne guzara to nahin

umr tufan ke thapeDon mein basar ki lekin

sakinan-e-lab-e-dariya ko pukara to nahin

raushni dil mein nazar aae to 'nashtar' sochen

ahd-e-rafta ne koi naqsh ubhaara to nahin