ho kuchh aaseb to wan chahiye ganDa tawiz

ho kuchh aaseb to vaañ chāhiye ganDā tā'vīz

aur jo ho 'ishq kā saaya to kare kyā tā'vīz

dil ko jis vaqt ye jin aan ke lipTā phir to

kyā kareñ vaañ vo jo likhte haiñ falītā tā'vīz

ham to jab hosh meñ aaveñ jo kahīñ se pāveñ

yaar ke haath kā baazū kā gale kā tā'vīz

zor tā'vīz kā chaltā to arab meñ yaaro

kyā koī ek bhī majnūñ ko na detā tā'vīz

kohkan koh ko kis vāste kaaTā kartā

dete ġham-ḳhvār na kyā is ke ta.iiñ lā tā'vīz

āḳhir us ke bhī gayā dil kā dhḌaknā us roz

qabr kā teshe ne jab us ke tarāshā tā'vīz

ham ko bhī kitne hī logoñ ne diye aah 'nazīr'

par kisī kā koī kuchh kaam na aayā tā'vīz

ho kuchh aaseb to wan chahiye ganDa ta'wiz

aur jo ho 'ishq ka saya to kare kya ta'wiz

dil ko jis waqt ye jin aan ke lipTa phir to

kya karen wan wo jo likhte hain falita ta'wiz

hum to jab hosh mein aawen jo kahin se pawen

yar ke hath ka bazu ka gale ka ta'wiz

zor ta'wiz ka chalta to arab mein yaro

kya koi ek bhi majnun ko na deta ta'wiz

kohkan koh ko kis waste kaTa karta

dete gham-KHwar na kya is ke tain la ta'wiz

aaKHir us ke bhi gaya dil ka dhDakna us roz

qabr ka teshe ne jab us ke tarasha ta'wiz

hum ko bhi kitne hi logon ne diye aah 'nazir'

par kisi ka koi kuchh kaam na aaya ta'wiz