ho raha hai kali par chaman ka guman

ho rahā hai kalī par chaman kā gumāñ

qābil-e-dīd hai ab mirā gulsitāñ

hai mirā zikr bhī aap kī dāstāñ

aap hote raheñ mujh se dāman-kashāñ

kyoñ bhaḌaktā nahīñ ab ye soz-e-nihāñ

thoḌā thoḌā sā kab tak uThegā dhuāñ

ho rahā hai mujhe raushnī kā yaqīñ

jis qadar baḌh rahī haiñ ye tārīkiyāñ

qaid dair-o-haram kī lagāte haiñ kyoñ

ek dil bhī to hai aap kā āstāñ

tez hote ga.e aur bhī kuchh qadam

jis qadar raah meñ aa.eñ dushvāriyāñ

aap aa.e bhī lekin is andāz se

baḌh ga.iiñ aur 'maikash' kī tanhā.iyāñ

ho raha hai kali par chaman ka guman

qabil-e-did hai ab mera gulsitan

hai mera zikr bhi aap ki dastan

aap hote rahen mujh se daman-kashan

kyon bhaDakta nahin ab ye soz-e-nihan

thoDa thoDa sa kab tak uThega dhuan

ho raha hai mujhe raushni ka yaqin

jis qadar baDh rahi hain ye tarikiyan

qaid dair-o-haram ki lagate hain kyon

ek dil bhi to hai aap ka aastan

tez hote gae aur bhi kuchh qadam

jis qadar rah mein aaen dushwariyan

aap aae bhi lekin is andaz se

baDh gain aur 'maikash' ki tanhaiyan