honTon par sahra rahta hai aankh mein khaara pani

hoñToñ par sahrā rahtā hai aañkh meñ khārā paanī

ek kinārā aag hai merā ek kināra paanī

sūkhe peḌ aur pyāsī āñkheñ āsmān ko dekheñ

miTTī meñ jā kar chhup baiThā dhuup kā maarā paanī

chaak kī is gardish ne māh-o-sāl lapeT liye

kūza-gar kī saarī pūñjī miTTī gaarā paanī

ātish-gīr masāfat hai aur ik ristā mashkīza

kab tak saath rahegā āḳhir ye bechāra paanī

aañkh ke bahte ashkoñ se hī pyaas bujhānī hogī

hijr ke tapte sahrā meñ hai sirf sahārā paanī

kaun galī se guzrūñ aur maiñ kaise tujh tak aa.uuñ

bastī saarī daldal hai aur rasta saarā paanī

sahrā ko hai yaad abhī tak pyaas kī fat.h-e-kāmil

zulm ko kaise maat huī aur kaise haarā paanī

honTon par sahra rahta hai aankh mein khaara pani

ek kinara aag hai mera ek kinara pani

sukhe peD aur pyasi aankhen aasman ko dekhen

miTTi mein ja kar chhup baiTha dhup ka mara pani

chaak ki is gardish ne mah-o-sal lapeT liye

kuza-gar ki sari punji miTTi gara pani

aatish-gir masafat hai aur ek rista mashkiza

kab tak sath rahega aaKHir ye bechaara pani

aankh ke bahte ashkon se hi pyas bujhani hogi

hijr ke tapte sahra mein hai sirf sahaara pani

kaun gali se guzrun aur main kaise tujh tak aaun

basti sari daldal hai aur rasta sara pani

sahra ko hai yaad abhi tak pyas ki fath-e-kaamil

zulm ko kaise mat hui aur kaise haara pani