hosh ganwa dun jis ko pi kar wo mai nahin maiKHane mein

hosh gañvā duuñ jis ko pī kar vo mai nahīñ maiḳhāne meñ

mujh ko ashk milāne hoñge apne har paimāne meñ

aaj ke din kā vaqt muqarrar us ne kiyā hai milne kā

dekheñ kitnī der bachī hai aaj qayāmat aane meñ

tere hone se ghar merā mahkā mahkā rahtā thā

tū jo nahīñ to ab rahtā huuñ jaise ik vīrāne meñ

jā maiñ ne āzād kiyā ab tujh ko tere va.adoñ se

tujh ko bhī āsānī hogī mujh ko chhoḌ ke jaane meñ

ab to āñkheñ ḳhushk huī haiñ us kī yaad meñ ro ro kar

koī batā.e mujh ko kitnī der hai us ke aane meñ

vo to ḳhush ho kar sunte haiñ merī mohabbat kā qissa

merā dam niklā jaatā hai dil kā haal sunāne meñ

'sāhil' behtar hai rakh le siine meñ chhupā kar ġham apnā

varna rusvā ho jā.egā dil ke zaḳhm dikhāne meñ

hosh ganwa dun jis ko pi kar wo mai nahin maiKHane mein

mujh ko ashk milane honge apne har paimane mein

aaj ke din ka waqt muqarrar us ne kiya hai milne ka

dekhen kitni der bachi hai aaj qayamat aane mein

tere hone se ghar mera mahka mahka rahta tha

tu jo nahin to ab rahta hun jaise ek virane mein

ja main ne aazad kiya ab tujh ko tere wadon se

tujh ko bhi aasani hogi mujh ko chhoD ke jaane mein

ab to aankhen KHushk hui hain us ki yaad mein ro ro kar

koi batae mujh ko kitni der hai us ke aane mein

wo to KHush ho kar sunte hain meri mohabbat ka qissa

mera dam nikla jata hai dil ka haal sunane mein

'sahil' behtar hai rakh le sine mein chhupa kar gham apna

warna ruswa ho jaega dil ke zaKHm dikhane mein