hosh mein aane ka andaz naya mange hai

hosh meñ aane kā andāz nayā māñge hai

ek be-ḳhud tire dāman kī havā māñge hai

āshiqī sabr-talab hogī kabhī sunte haiñ

kohkan aaj kā phūloñ kī qabā māñge hai

tujh se meñ bhiik mohabbat kī bhī māñgūñ kaise

kab koī laash ke jiine kī duā māñge hai

dast-kash aap jafā se na hoñ itnā hai bahut

kaun kam-zarf vafāoñ kā sila māñge hai

fasl-e-gul kuchh to kamī hai jo chaman kā har phuul

surḳhī-e-ḳhūn-e-shahīdān-e-vafā māñge hai

shauq-e-manzil use ab dekhiye le jaa.e kidhar

raah par ḳhaas 'vasī' ābla-pā māñge hai

hosh mein aane ka andaz naya mange hai

ek be-KHud tere daman ki hawa mange hai

aashiqi sabr-talab hogi kabhi sunte hain

kohkan aaj ka phulon ki qaba mange hai

tujh se mein bhik mohabbat ki bhi mangun kaise

kab koi lash ke jine ki dua mange hai

dast-kash aap jafa se na hon itna hai bahut

kaun kam-zarf wafaon ka sila mange hai

fasl-e-gul kuchh to kami hai jo chaman ka har phul

surKHi-e-KHun-e-shahidan-e-wafa mange hai

shauq-e-manzil use ab dekhiye le jae kidhar

rah par KHas 'wasi' aabla-pa mange hai