hosh mein aata hai insan Thokaren khane ke baad

hosh meñ aatā hai insāñ Thokareñ khāne ke baa'd

din nikaltā hai añdherī raat Dhal jaane ke baa'd

har koī duniyā meñ apne ko samajhtā hai ḳhudā

ek dīvāna paḌā hai ek dīvāne ke baa'd

aap āñkhoñ se pilā.eñ aur phir dekheñ zarā

ek paimāna bharegā ek paimāne ke baa'd

kaun kahtā hai nahīñ hai 'ishq merā kāmyāb

zikr karte haiñ vo merā apne afsāne ke baa'd

ek parda bhī rahegā dil-lagī kī dil-lagī

ek masjid bhī banāo ek maiḳhāne ke baa'd

be-tukī kartā hai bāteñ jab talak piitā nahīñ

hosh meñ aatā hai vā'iz jaam chhalkāne ke baa'd

kyā kare koī bharosa rahnumāoñ par 'kañval'

ḳhud bahak jaate haiñ aksar ham ko samjhāne ke baa'd

hosh mein aata hai insan Thokaren khane ke ba'd

din nikalta hai andheri raat Dhal jaane ke ba'd

har koi duniya mein apne ko samajhta hai KHuda

ek diwana paDa hai ek diwane ke ba'd

aap aankhon se pilaen aur phir dekhen zara

ek paimana bharega ek paimane ke ba'd

kaun kahta hai nahin hai 'ishq mera kaamyab

zikr karte hain wo mera apne afsane ke ba'd

ek parda bhi rahega dil-lagi ki dil-lagi

ek masjid bhi banao ek maiKHane ke ba'd

be-tuki karta hai baaten jab talak pita nahin

hosh mein aata hai wa'iz jam chhalkane ke ba'd

kya kare koi bharosa rahnumaon par 'kanwal'

KHud bahak jate hain aksar hum ko samjhane ke ba'd