hosh us par kisi ka bas na chala

'hosh' us par kisī kā bas na chalā

vaqt jab aa gayā to phir na Talā

soz-e-bātin ke haiñ ye sab jalve

aag raushan hai le charāġh jalā

na chalā dil pe zindagī kā fareb

saḳht lohā is aañch se na galā

kah rahā thā gadā-e-rāh-nashīn

jo bhalā thā huā usī kā bhalā

vo mirā mudda.ā samajh ke rahe

zabt-e-fariyād se na kaam chalā

rāz-e-hastī na khul sakā us par

dil jo apnī hī aag meñ na jalā

kyā bahāroñ kā e.atibār ai 'hosh'

har-nafas taak meñ hai barq-e-balā

'hosh' us par kisi ka bas na chala

waqt jab aa gaya to phir na Tala

soz-e-baatin ke hain ye sab jalwe

aag raushan hai le charagh jala

na chala dil pe zindagi ka fareb

saKHt loha is aanch se na gala

kah raha tha gada-e-rah-nashin

jo bhala tha hua usi ka bhala

wo mera muddaa samajh ke rahe

zabt-e-fariyaad se na kaam chala

raaz-e-hasti na khul saka us par

dil jo apni hi aag mein na jala

kya bahaaron ka eatibar ai 'hosh'

har-nafas tak mein hai barq-e-bala