hote honge is duniya mein arsh ke dawedar buland

hote hoñge is duniyā meñ arsh ke da.avedār buland

pastī ke ham rahne vaale nikle āḳhir-e-kār buland

ek taraf ho tum afsurda ek taraf ham āzurda

aur chaman ko bāñTo yaaro aur karo dīvār buland

kab zid kī hai ham ne tum se apnī ūñchī hastī kī

kaisī bahs taqāzā kaisā tum ho ham se yaar buland

le aa.ī majbūrī ham ko aaj parā.ī mahfil meñ

aur tamāsha dekh rahe haiñ ho ho kar aġhyār buland

shā.er aur takabbur meñ kyā rishta in meñ nisbat kyā

shahr-e-suḳhan meñ rakhiye apne sar ko ḳham me.aar buland

izzat-afzā.ī hai be-shak baat muqaddar kī 'in.ām'

varna qudrat ne rakkhe haiñ phūloñ se bhī ḳhaar buland

hote honge is duniya mein arsh ke dawedar buland

pasti ke hum rahne wale nikle aaKHir-e-kar buland

ek taraf ho tum afsurda ek taraf hum aazurda

aur chaman ko banTo yaro aur karo diwar buland

kab zid ki hai hum ne tum se apni unchi hasti ki

kaisi bahs taqaza kaisa tum ho hum se yar buland

le aai majburi hum ko aaj parai mahfil mein

aur tamasha dekh rahe hain ho ho kar aghyar buland

shaer aur takabbur mein kya rishta in mein nisbat kya

shahr-e-suKHan mein rakhiye apne sar ko KHam mear buland

izzat-afzai hai be-shak baat muqaddar ki 'inam'

warna qudrat ne rakkhe hain phulon se bhi KHar buland