hoti hai unki hum pe inayat kabhi kabhi

hotī hai un kī ham pe ināyat kabhī kabhī

aatī nazar hai chāñd sī sūrat kabhī kabhī

ġhairoñ ke mashvare ke liye vaqf raat din

mujh se magar hai milne kī fursat kabhī kabhī

ġhusse meñ un ko dekh ke mujh ko gumāñ huā

aatī hai is tarah bhī qayāmat kabhī kabhī

va.ade vo ham se toḌ ke ġhairoñ ke ho ga.e

aatī to hogī dil meñ nadāmat kabhī kabhī

dīdār un kā chashm-e-zadan meñ huā to hai

taqdīr se vo aa.ī hai saa.at kabhī kabhī

chhup jaanā un kā sharm se chilman kī aaḌ meñ

badnām yuuñ bhī kartī hai ulfat kabhī kabhī

ulfat pe marne vāloñ pe rotī hai bekasī

dekhī hai ham ne aisī bhī niyyat kabhī kabhī

'rāhī' ab un se shikva-e-bedād kar to lo

hotī hai dil-jaloñ ko shikāyat kabhī kabhī

hoti hai un ki hum pe inayat kabhi kabhi

aati nazar hai chand si surat kabhi kabhi

ghairon ke mashware ke liye waqf raat din

mujh se magar hai milne ki fursat kabhi kabhi

ghusse mein un ko dekh ke mujh ko guman hua

aati hai is tarah bhi qayamat kabhi kabhi

wade wo hum se toD ke ghairon ke ho gae

aati to hogi dil mein nadamat kabhi kabhi

didar un ka chashm-e-zadan mein hua to hai

taqdir se wo aai hai saat kabhi kabhi

chhup jaana un ka sharm se chilman ki aaD mein

badnam yun bhi karti hai ulfat kabhi kabhi

ulfat pe marne walon pe roti hai bekasi

dekhi hai hum ne aisi bhi niyyat kabhi kabhi

'rahi' ab un se shikwa-e-bedad kar to lo

hoti hai dil-jalon ko shikayat kabhi kabhi