hoti rahti hai KHalish dard ki aksar dil mein

hotī rahtī hai ḳhalish dard kī aksar dil meñ

rah gayā ho na kahīñ TuuT ke nashtar dil meñ

aatā rahtā hai tasavvur tirī mast āñkhoñ kā

chalte rahte haiñ mai-e-nāb ke sāġhar dil meñ

ḳhvāb meñ ḳhuub liye ham ne tasavvur ke maze

aaj mehmān rahā hai koī shab bhar dil meñ

jo mazā terī jafā meñ hai kisī shai meñ nahīñ

ghar banā lete haiñ ye ḳhanjar-o-nashtar dil meñ

kabhī hañstā huuñ tirī dhun meñ kabhī rotā huuñ

yaas rahtī hai tamanna ke barābar dil meñ

ġham nahīñ shauq nahīñ dard nahīñ kuchh bhī nahīñ

jhuuT gar jānte ho dekh lo aa kar dil meñ

tū sahī aag lagā duuñ maiñ qayāmat kar duuñ

dil-jale rakhte haiñ sarmāya-e-mahshar dil meñ

ab khulā rāz-e-qarīb-e-rag-e-jāñ kā uqda

jis ko ham DhūñDte phirte haiñ vo hai har dil meñ

ye baḌā husn hai tasvīr meñ us kī 'hāmid'

ghar banā letī hai āñkhoñ se utar kar dil meñ

hoti rahti hai KHalish dard ki aksar dil mein

rah gaya ho na kahin TuT ke nashtar dil mein

aata rahta hai tasawwur teri mast aankhon ka

chalte rahte hain mai-e-nab ke saghar dil mein

KHwab mein KHub liye hum ne tasawwur ke maze

aaj mehman raha hai koi shab bhar dil mein

jo maza teri jafa mein hai kisi shai mein nahin

ghar bana lete hain ye KHanjar-o-nashtar dil mein

kabhi hansta hun teri dhun mein kabhi rota hun

yas rahti hai tamanna ke barabar dil mein

gham nahin shauq nahin dard nahin kuchh bhi nahin

jhuT gar jaante ho dekh lo aa kar dil mein

tu sahi aag laga dun main qayamat kar dun

dil-jale rakhte hain sarmaya-e-mahshar dil mein

ab khula raaz-e-qarib-e-rag-e-jaan ka uqda

jis ko hum DhunDte phirte hain wo hai har dil mein

ye baDa husn hai taswir mein us ki 'hamid'

ghar bana leti hai aankhon se utar kar dil mein