hua chale ya ruke KHushnuma saman ho jae

huā chale yā ruke ḳhushnumā samāñ ho jaa.e

ye saat rañg kā āñchal jo bādbāñ ho jaa.e

sulag rahā huuñ ka.ī din se apne kamre meñ

darīcha kholūñ to duniyā dhuāñ dhuāñ ho jaa.e

badal ke naam sunā rakkhī hai use har baat

ye ek baat batā duuñ to rāz-dāñ ho jaa.e

maiñ apne aap ko chhoḌ aayā huuñ kahīñ pīchhe

kuchh aur tez chalūñ maiñ to kārvāñ ho jaa.e

yahīñ kahīñ vo mire saath thā maiñ sochtā huuñ

yahāñ ghaḌī do ghaḌī koī sā.ebāñ ho jaa.e

ye intishār hai tartīb-e-nau na jaan ise

ki kā.enāt kī har shai yahāñ vahāñ ho jaa.e

sarishk-e-ġham ko tabassum kī siip meñ rakhiye

ki raaz raaz rahe hāl-e-dil bayāñ ho jaa.e

paroñ pe titlī ke paiġhām likh ke bhejūñ maiñ

havā kā jhoñkā kisī din ḳhabar-rasāñ ho jaa.e

jahāñ kī riit hai kohrām machne lagtā hai

kisī ko ishq ho yā marg-e-nā-gahāñ ho jaa.e

abhī to jism mirā dhuup kī amaan meñ hai

parā.e saa.e meñ aa kar na be-amāñ ho jaa.e

hai is jahāñ kī har baat aam sī lekin

jo sachche sher meñ Dhal jaa.e dāstāñ ho jaa.e

hua chale ya ruke KHushnuma saman ho jae

ye sat rang ka aanchal jo baadban ho jae

sulag raha hun kai din se apne kamre mein

daricha kholun to duniya dhuan dhuan ho jae

badal ke nam suna rakkhi hai use har baat

ye ek baat bata dun to raaz-dan ho jae

main apne aap ko chhoD aaya hun kahin pichhe

kuchh aur tez chalun main to karwan ho jae

yahin kahin wo mere sath tha main sochta hun

yahan ghaDi do ghaDi koi saeban ho jae

ye intishaar hai tartib-e-nau na jaan ise

ki kaenat ki har shai yahan wahan ho jae

sarishk-e-gham ko tabassum ki sip mein rakhiye

ki raaz raaz rahe haal-e-dil bayan ho jae

paron pe titli ke paigham likh ke bhejun main

hawa ka jhonka kisi din KHabar-rasan ho jae

jahan ki rit hai kohram machne lagta hai

kisi ko ishq ho ya marg-e-na-gahan ho jae

abhi to jism mera dhup ki aman mein hai

parae sae mein aa kar na be-aman ho jae

hai is jahan ki har baat aam si lekin

jo sachche sher mein Dhal jae dastan ho jae