hua hai ye kya kuchh samajh mein na aae

huā hai ye kyā kuchh samajh meñ na aa.e

koī bhī na us ke sivā dil ko bhaa.e

koī bhī to apnā nahīñ is jahāñ meñ

jo apne the vo bhī hue ab parā.e

na jaane ye kab se haiñ āñkhoñ meñ aañsū

koī kaash rote huoñ ko hañsā.e

nikal aa.e kāñToñ se ham bach-bachā ke

guloñ se magar ham ne haiñ zaḳhm khaa.e

nazar jab bhī aa.e hasīñ us kā chehra

to us par hī jā kar nazar Thahr jaa.e

uThīñ jab bhī un kī vo āñkheñ ġhazālī

unheñ dekh kar dil mirā Dol jaa.e

muqaddar meñ dar dar kī haiñ Thokareñ ab

hamāre hī yāroñ ne ye din dikhā.e

amar ho ga.e mar ke ulfat ke raahī

kiyā pyaar jis ne vo manzil ko paa.e

nahīñ koī bantā kisī kā jahāñ meñ

musībat meñ to chhoḌ jaate haiñ saa.e

baḌe ḳhūb-rū ho baḌe ḳhush-gulū ho

tumheñ to ḳhudā nazar-e-bad se bachā.e

taḌapte haiñ ham us kī furqat meñ 'sāġhar'

kaho us se jā kar ki ab lauT aa.e

hua hai ye kya kuchh samajh mein na aae

koi bhi na us ke siwa dil ko bhae

koi bhi to apna nahin is jahan mein

jo apne the wo bhi hue ab parae

na jaane ye kab se hain aankhon mein aansu

koi kash rote huon ko hansae

nikal aae kanTon se hum bach-bacha ke

gulon se magar hum ne hain zaKHm khae

nazar jab bhi aae hasin us ka chehra

to us par hi ja kar nazar Thahr jae

uThin jab bhi un ki wo aankhen ghazali

unhen dekh kar dil mera Dol jae

muqaddar mein dar dar ki hain Thokaren ab

hamare hi yaron ne ye din dikhae

amar ho gae mar ke ulfat ke rahi

kiya pyar jis ne wo manzil ko pae

nahin koi banta kisi ka jahan mein

musibat mein to chhoD jate hain sae

baDe KHub-ru ho baDe KHush-gulu ho

tumhein to KHuda nazar-e-bad se bachae

taDapte hain hum us ki furqat mein 'saghar'

kaho us se ja kar ki ab lauT aae