hua nahin hai abhi munharif zaban se wo

huā nahīñ hai abhī munharif zabān se vo

sitāre toḌ ke lā.egā āsmān se vo

na ham ko paar utārā na aap hī utrā

lipaT ke baiThā hai patvār o bādbān se vo

hamārī ḳhair hai aadī haiñ dhuup sahne ke ham

huā hai aap bhī mahrūm sā.ebān se vo

tamām bazm pe chhāyā huā hai sannāTā

uThā hai shaḳhs koī apne darmiyān se vo

abhī to rif.ateñ kyā kyā thiiñ muntazir us kī

abhī palaT ke bhī aayā na thā uḌaan se vo

hazār mailā kiyā dil ko us kī jānib se

kisī bhī taur utartā nahīñ hai dhyān se vo

ab us kī yaad ab us kā malāl kaisā hai

nikal gayā jo pare sarhad-e-gumān se vo

vo jis 'sukūn' kā ab aap pūchhne aa.e

chalā gayā hai kahīñ uTh ke is makān se vo

hua nahin hai abhi munharif zaban se wo

sitare toD ke laega aasman se wo

na hum ko par utara na aap hi utra

lipaT ke baiTha hai patwar o baadban se wo

hamari KHair hai aadi hain dhup sahne ke hum

hua hai aap bhi mahrum saeban se wo

tamam bazm pe chhaya hua hai sannaTa

uTha hai shaKHs koi apne darmiyan se wo

abhi to rifaten kya kya thin muntazir us ki

abhi palaT ke bhi aaya na tha uDan se wo

hazar maila kiya dil ko us ki jaanib se

kisi bhi taur utarta nahin hai dhyan se wo

ab us ki yaad ab us ka malal kaisa hai

nikal gaya jo pare sarhad-e-guman se wo

wo jis 'sukun' ka ab aap puchhne aae

chala gaya hai kahin uTh ke is makan se wo