hua piri mein ishq us naujawan ka

huā piirī meñ ishq us naujavāñ kā

ilāhī mujh meñ zor aaya kahāñ kā

paḌā saaya jo us sarv-e-ravāñ kā

milā rutba zamīñ ko āsmāñ kā

irāda jab huā mujh ko fuġhāñ kā

dhuāñ ban kar uḌā rang āsmāñ kā

samajhte haiñ gadā qand-e-mukarrar

kalām us ḳhusrav-e-shīrīñ-dahāñ kā

dil apnā bach nahīñ saktā nazar se

nishāna hai vo tīr-e-be-kamāñ kā

bahut DhūñDhī kamar āḳhir na paa.ī

patā miltā kahīñ hai be-nishāñ kā

paḌī majnūñ ke paañv meñ jo zanjīr

uThānā hī paḌā bār-e-garāñ kā

miTā huuñ ai humā un kī talab meñ

tajassus chhoḌ mere ustuḳhvāñ kā

safar hai āḳhirat kā pesh 'ājiz'

tujhe sāmān lāzim hai vahāñ kā

hua piri mein ishq us naujawan ka

ilahi mujh mein zor aaya kahan ka

paDa saya jo us sarw-e-rawan ka

mila rutba zamin ko aasman ka

irada jab hua mujh ko fughan ka

dhuan ban kar uDa rang aasman ka

samajhte hain gada qand-e-mukarrar

kalam us KHusraw-e-shirin-dahan ka

dil apna bach nahin sakta nazar se

nishana hai wo tir-e-be-kaman ka

bahut DhunDhi kamar aaKHir na pai

pata milta kahin hai be-nishan ka

paDi majnun ke panw mein jo zanjir

uThana hi paDa bar-e-garan ka

miTa hun ai huma un ki talab mein

tajassus chhoD mere ustuKHwan ka

safar hai aaKHirat ka pesh 'ajiz'

tujhe saman lazim hai wahan ka