hua shab ko abas mai ke liye jaana to kya hoga

huā shab ko 'abas mai ke liye jaanā to kyā hogā

añdhere meñ nazar aayā na mai-ḳhāna to kyā hogā

chaman vaalo qafas kī qaid be-mī’ād hotī hai

tumhī aao to aa jaanā mirā aanā to kyā hogā

girā hai jaam ḳhud saaqī se us par hashr barpā hai

mire hāthoñ se chhūTegā jo paimāna to kyā hogā

jagah tabdīl karne ko to kar luuñ bazm-e-sāqī meñ

vahāñ bhī aa sakā mujh tak na paimāna to kyā hogā

bahār-e-gul bane baiThe ho tum ġhairoñ kī mahfil meñ

koī aise meñ ho jaa.e jo dīvāna to kyā hogā

sar-e-mahshar mujhe dekhā to vo dil meñ ye socheñge

jo pahchānā to kyā hogā na pahchānā to kyā hogā

hifāzat ke liye ujḌī huī mahfil meñ baiThe haiñ

uḌā dī gar kisī ne ḳhāk-e-parvāna to kyā hogā

zabāñ to band karvāte ho tum allāh ke aage

kahā ham ne agar āñkhoñ se afsāna to kyā hogā

'qamar' us ajnabī mahfil meñ tum jaate to ho lekin

vahāñ tum ko kisī ne bhī na pahchānā to kyā hogā

hua shab ko 'abas mai ke liye jaana to kya hoga

andhere mein nazar aaya na mai-KHana to kya hoga

chaman walo qafas ki qaid be-mi’ad hoti hai

tumhi aao to aa jaana mera aana to kya hoga

gira hai jam KHud saqi se us par hashr barpa hai

mere hathon se chhuTega jo paimana to kya hoga

jagah tabdil karne ko to kar lun bazm-e-saqi mein

wahan bhi aa saka mujh tak na paimana to kya hoga

bahaar-e-gul bane baiThe ho tum ghairon ki mahfil mein

koi aise mein ho jae jo diwana to kya hoga

sar-e-mahshar mujhe dekha to wo dil mein ye sochenge

jo pahchana to kya hoga na pahchana to kya hoga

hifazat ke liye ujDi hui mahfil mein baiThe hain

uDa di gar kisi ne KHak-e-parwana to kya hoga

zaban to band karwate ho tum allah ke aage

kaha hum ne agar aankhon se afsana to kya hoga

'qamar' us ajnabi mahfil mein tum jate to ho lekin

wahan tum ko kisi ne bhi na pahchana to kya hoga