hudud-e-zat mein auron ka zikr hi kya hai

hudūd-e-zāt meñ auroñ kā zikr hī kyā hai

ḳhud aadmī bhī na samjhā ki aadmī kyā hai

ye fāsle jo tire qurb kī zamānat haiñ

simaT ga.e to batā.ūñgā zindagī kyā hai

hamī ko ḳhaak samajh lo tumhārī umr-e-darāz

ye tazkira to mukammal ho aadmī kyā hai

hijāb-e-zāt se bāhar kahāñ abhī ham log

abhī ye kaun batā.e ki aadmī kyā hai

kahā na thā ki mohabbat kā tazkira na karo

kise ḳhabar thī ki me.arāj-e-zindagī kyā hai

savāl ye hai ki tum kyā nigāh rakhte ho

niyāz-mand to vāqif hai bandagī kyā hai

ravā nahīñ hai musalsal gurez-e-naqd-o-nazar

kabhī kabhī to batāo ki zindagī kyā hai

abhī to mujh se ḳhudā.ī kī had meñ baat karo

ḳhudā bano to batānā ki aadmī kyā hai

jabīn-e-shauq pe sajdoñ ke daaġh ai 'anjum'

ye bandagī hai to me.ār-e-bandagī kyā hai

hudud-e-zat mein auron ka zikr hi kya hai

KHud aadmi bhi na samjha ki aadmi kya hai

ye fasle jo tere qurb ki zamanat hain

simaT gae to bataunga zindagi kya hai

hami ko KHak samajh lo tumhaari umr-e-daraaz

ye tazkira to mukammal ho aadmi kya hai

hijab-e-zat se bahar kahan abhi hum log

abhi ye kaun batae ki aadmi kya hai

kaha na tha ki mohabbat ka tazkira na karo

kise KHabar thi ki mearaj-e-zindagi kya hai

sawal ye hai ki tum kya nigah rakhte ho

niyaz-mand to waqif hai bandagi kya hai

rawa nahin hai musalsal gurez-e-naqd-o-nazar

kabhi kabhi to batao ki zindagi kya hai

abhi to mujh se KHudai ki had mein baat karo

KHuda bano to batana ki aadmi kya hai

jabin-e-shauq pe sajdon ke dagh ai 'anjum'

ye bandagi hai to mear-e-bandagi kya hai