hue hain ahl-e-nazar jaane kis dayar mein gum

hue haiñ ahl-e-nazar jaane kis dayār meñ gum

charāġh sog meñ haiñ bazm intizār meñ gum

kisī se kyā karam-e-mīr-e-kārvāñ kahiye

na jaane kitne musāfir hue ġhubār meñ gum

kuchh aisā be-ḳhudī-e-shab kā silsila hai ki log

sahar ko bhī haiñ charāġhāñ ke intizār meñ gum

ġharīb kis se tabassum kā falsafa pūchhe

amīr-e-shahr to hai apne kārobār meñ gum

sabhī safar meñ haiñ ye apnī apnī qismat hai

kisī ke sāmne manzil koī ġhubār meñ gum

tirā ye nazm-e-chaman bāġhbāñ hameñ taslīm

magar vo phuul hue jo bharī bahār meñ gum

'majīd' kitne hī dil haiñ javāb-e-lāla-o-gul

magar nazar hai tirī apne shāhkār meñ gum

hue hain ahl-e-nazar jaane kis dayar mein gum

charagh sog mein hain bazm intizar mein gum

kisi se kya karam-e-mir-e-karwan kahiye

na jaane kitne musafir hue ghubar mein gum

kuchh aisa be-KHudi-e-shab ka silsila hai ki log

sahar ko bhi hain charaghan ke intizar mein gum

gharib kis se tabassum ka falsafa puchhe

amir-e-shahr to hai apne karobar mein gum

sabhi safar mein hain ye apni apni qismat hai

kisi ke samne manzil koi ghubar mein gum

tera ye nazm-e-chaman baghban hamein taslim

magar wo phul hue jo bhari bahaar mein gum

'majid' kitne hi dil hain jawab-e-lala-o-gul

magar nazar hai teri apne shahkar mein gum