hue hum jab se paida apne diwane hue hote

hue ham jab se paidā apne dīvāne hue hote

ḳhudā ko ham pahuñchte ḳhud se begāne hue hote

mazā raushan-dillī kā zindagānī hai tajarrud se

ham apne misl shabnam aab aur daane hue hote

muue ham intizār-e-nashsha se ḳhoshoñ ke jā yārab

huvaidā taak se pur-bāda paimāne hue hote

hoveñge ḳhaak vus.at mashrabī kī rah ga.ī hasrat

ham avval hī se misl-e-dasht vīrāne hue hote

rahe duniyā meñ be-aish aur shuhūd-e-haq se uqbā meñ

hue zuhhād kor ai kaash ke kaane hue hote

mai-e-irfāñ kā zarf aadam hī ko thā gar malak dete

to saat iblīs ke sargarm yārāne hue hote

abas tum munzavī masjid meñ ho zuhhād kyā hāsil

vo sāhab etakāf-e-kunj-e-maiḳhāne hue hote

hue mastoñ pe gar teġh-e-zabāñ-zan shaiḳh sheḳhī meñ

jo apne nafs-parvar hote mardāne hue hote

agar sad-chāk ho haat us ke lagte aish thā 'uzlat'

dil-e-ushshāq saare kaash ke shāne hue hote

hue hum jab se paida apne diwane hue hote

KHuda ko hum pahunchte KHud se begane hue hote

maza raushan-dilli ka zindagani hai tajarrud se

hum apne misl shabnam aab aur dane hue hote

mue hum intizar-e-nashsha se KHoshon ke ja yarab

huwaida tak se pur-baada paimane hue hote

howenge KHak wusat mashrabi ki rah gai hasrat

hum awwal hi se misl-e-dasht virane hue hote

rahe duniya mein be-aish aur shuhud-e-haq se uqba mein

hue zuhhad kor ai kash ke kane hue hote

mai-e-irfan ka zarf aadam hi ko tha gar malak dete

to sat iblis ke sargarm yarane hue hote

abas tum munzawi masjid mein ho zuhhad kya hasil

wo sahab etakaf-e-kunj-e-maiKHane hue hote

hue maston pe gar tegh-e-zaban-zan shaiKH sheKHi mein

jo apne nafs-parwar hote mardane hue hote

agar sad-chaak ho hat us ke lagte aish tha 'uzlat'

dil-e-ushshaq sare kash ke shane hue hote