hue jis ishq ke mahsur jaane hi nahin deta

hue jis ishq ke mahsūr jaane hī nahīñ detā

hameñ ḳhud se ziyāda duur jaane hī nahīñ detā

mizājan ibtidā se ham asīr-e-dasht-e-hijrāñ haiñ

jahāñ se ab dil-e-majbūr jaane hī nahīñ detā

ye lutf-e-ishq aisā hai lipaT jaatā hai pairoñ se

koī sarmad ho yā mansūr jaane hī nahīñ detā

jahāñ bechain phirte haiñ ujāle māñgne vaale

añdherā us jagah tak nuur jaane hī nahīñ detā

hameñ darkār hai ruḳhsat ġham-e-daurāñ se kuchh din kī

vo arzī kar ke nā-manzūr jaane hī nahīñ detā

ajab surma banāyā hai tirī zarb-e-tajallī ne

mirī āñkhoñ se koh-e-tūr jaane hī nahīñ detā

fazāoñ meñ vafā aur ḳhaak meñ itnī mohabbat hai

kahāñ jā.ūñ bahāvalpūr jaane hī nahīñ detā

hue jis ishq ke mahsur jaane hi nahin deta

hamein KHud se ziyaada dur jaane hi nahin deta

mizajan ibtida se hum asir-e-dasht-e-hijran hain

jahan se ab dil-e-majbur jaane hi nahin deta

ye lutf-e-ishq aisa hai lipaT jata hai pairon se

koi sarmad ho ya mansur jaane hi nahin deta

jahan bechain phirte hain ujale mangne wale

andhera us jagah tak nur jaane hi nahin deta

hamein darkar hai ruKHsat gham-e-dauran se kuchh din ki

wo arzi kar ke na-manzur jaane hi nahin deta

ajab surma banaya hai teri zarb-e-tajalli ne

meri aankhon se koh-e-tur jaane hi nahin deta

fazaon mein wafa aur KHak mein itni mohabbat hai

kahan jaun bahawalpur jaane hi nahin deta