hue ruswa-e-ulfat umr bhar ko

hue rusvā-e-ulfat umr bhar ko

jigar rotā hai dil ko dil jigar ko

mire dil ko vo taktā hai jigar ko

ḳhabar apnī nahīñ us be-ḳhabar ko

kabhī hogā na kam saudā-e-ulfat

liye phirtā huuñ saath is dard-e-sar ko

kisī se bhī nahīñ miltī kisī din

nazar shāyad lagī terī nazar ko

milā de yā ilāhī tū milā de

asar se nāla-hā-e-be-asar ko

jo maiñ guzrā idhar to dāġh-e-dil ne

kiyā raushan charāġh-e-rahguzar ko

pasand aatā hai hañsnā ai sitamgar

lab-e-sofār kā zaḳhm-e-jigar ko

butoñ kī dostī se kyā natīja

ḳhudā se chāhiye ulfat bashar ko

javānī meñ abas hai fikr-e-pīrī

abhī hai raat muddat hai sahar ko

mai-e-ulfat kī aisī be-ḳhudī hai

ḳhabar dil kī nahīñ 'hāmid' jigar ko

hue ruswa-e-ulfat umr bhar ko

jigar rota hai dil ko dil jigar ko

mere dil ko wo takta hai jigar ko

KHabar apni nahin us be-KHabar ko

kabhi hoga na kam sauda-e-ulfat

liye phirta hun sath is dard-e-sar ko

kisi se bhi nahin milti kisi din

nazar shayad lagi teri nazar ko

mila de ya ilahi tu mila de

asar se nala-ha-e-be-asar ko

jo main guzra idhar to dagh-e-dil ne

kiya raushan charagh-e-rahguzar ko

pasand aata hai hansna ai sitamgar

lab-e-sofar ka zaKHm-e-jigar ko

buton ki dosti se kya natija

KHuda se chahiye ulfat bashar ko

jawani mein abas hai fikr-e-piri

abhi hai raat muddat hai sahar ko

mai-e-ulfat ki aisi be-KHudi hai

KHabar dil ki nahin 'hamid' jigar ko