hui dil TuTne par is tarah dil se fughan paida

huī dil TūTne par is tarah dil se fuġhāñ paidā

ki jaise sham.a ke bujhne se hotā hai dhuāñ paidā

rahā sābit-qadam yuuñ hī agar 'azm-e-safar apnā

karegī ḳhud rah-e-dushvār hī āsāniyāñ paidā

har ik tā'mīr ḳhud apnī tabāhī saath laatī hai

na girtī barq gar hotī na shāḳh-e-āshiyāñ paidā

mirī ḳhvāhish ki ik sajda miTā de nām-e-peshānī

tirī ḳhvāhish ho peshānī pe sajdoñ kā nishāñ paidā

vo jin kī maut par rote haiñ barsoñ jām-o-paimāna

ab aise bāda-kash hote haiñ ai saaqī kahāñ paidā

zarūrat kyā kareñ ham justajū-e-āstāñ ai dil

salāmat zauq-e-sajda aap hogā āstāñ paidā

nazar meñ jin kī rañgīnī tabī'at meñ hai rā'nā.ī

vo kar lete haiñ 'fāzil' dasht meñ bhī gulsitāñ paidā

hui dil TuTne par is tarah dil se fughan paida

ki jaise shama ke bujhne se hota hai dhuan paida

raha sabit-qadam yun hi agar 'azm-e-safar apna

karegi KHud rah-e-dushwar hi aasaniyan paida

har ek ta'mir KHud apni tabahi sath lati hai

na girti barq gar hoti na shaKH-e-ashiyan paida

meri KHwahish ki ek sajda miTa de nam-e-peshani

teri KHwahish ho peshani pe sajdon ka nishan paida

wo jin ki maut par rote hain barson jam-o-paimana

ab aise baada-kash hote hain ai saqi kahan paida

zarurat kya karen hum justaju-e-astan ai dil

salamat zauq-e-sajda aap hoga aastan paida

nazar mein jin ki rangini tabi'at mein hai ra'nai

wo kar lete hain 'fazil' dasht mein bhi gulsitan paida