hui kam-zarfi-e-gham hijr mein giryan ho kar

huī kam-zarfī-e-ġham hijr meñ giryāñ ho kar

ek aañsū ne Duboyā hameñ tūfāñ ho kar

dil meñ ik hasrat-e-tāmīr hai so rangoñ se

aur ābād huā ghar mirā vīrāñ ho kar

khul gayā chashm-e-tamāshā kā bharam jalvoñ par

kyā milā jalva-gah-e-husn meñ hairāñ ho kar

ik nayā dām-e-vafā Daal rahe haiñ shāyad

tere gesū mire shānoñ pe pareshāñ ho kar

aa hī jaate haiñ alam-ḳhāna-e-tārīk meñ vo

chāñdnī ban ke kabhī sub.h-e-daraḳhshāñ ho kar

merī āvāz meñ un kī bhī sadā muzmar hai

un kī mahfil se jo aaya huuñ ġhazal-ḳhvāñ ho kar

ye bhī ik shoḳh kā faizān-e-nazar hai 'sāġhar'

ki jahāñ dekh rahā hai mujhe hairāñ ho kar

hui kam-zarfi-e-gham hijr mein giryan ho kar

ek aansu ne Duboya hamein tufan ho kar

dil mein ek hasrat-e-tamir hai so rangon se

aur aabaad hua ghar mera viran ho kar

khul gaya chashm-e-tamasha ka bharam jalwon par

kya mila jalwa-gah-e-husn mein hairan ho kar

ek naya dam-e-wafa Dal rahe hain shayad

tere gesu mere shanon pe pareshan ho kar

aa hi jate hain alam-KHana-e-tarik mein wo

chandni ban ke kabhi subh-e-daraKHshan ho kar

meri aawaz mein un ki bhi sada muzmar hai

un ki mahfil se jo aaya hun ghazal-KHwan ho kar

ye bhi ek shoKH ka faizan-e-nazar hai 'saghar'

ki jahan dekh raha hai mujhe hairan ho kar