hui main kaise nazar ka shikar kya malum

huī maiñ kaise nazar kā shikār kyā ma.alūm

milegā kab mire dil ko qarār kyā ma.alūm

kisī kī yaad meñ din to guzar gayā lekin

kaTegī kaise shab-e-intizār kyā ma.alūm

maiñ sach kahūñgī magar jāntī huuñ duniyā meñ

karegā kaun mirā e.atibār kyā ma.alūm

qafas meñ qaid haiñ jo log unheñ ḳhabar hī nahīñ

ḳhizāñ hai yā hai chaman meñ bahār kyā ma.alūm

mire qarīb se uTh kar tumhāre jaate hī

bikhar ga.e haiñ kyoñ hastī ke taar kyā ma.alūm

tirī talāsh meñ guzrī hai zindagī yā-rab

bisāt-e-gardish-e-lail-o-nahār kyā ma.alūm

tamām raat satātā hai ik ḳhayāl 'jamāl'

karegā kaun sitāre shumār kyā ma.alūm

hui main kaise nazar ka shikar kya malum

milega kab mere dil ko qarar kya malum

kisi ki yaad mein din to guzar gaya lekin

kaTegi kaise shab-e-intizar kya malum

main sach kahungi magar jaanti hun duniya mein

karega kaun mera eatibar kya malum

qafas mein qaid hain jo log unhen KHabar hi nahin

KHizan hai ya hai chaman mein bahaar kya malum

mere qarib se uTh kar tumhaare jate hi

bikhar gae hain kyon hasti ke tar kya malum

teri talash mein guzri hai zindagi ya-rab

bisat-e-gardish-e-lail-o-nahaar kya malum

tamam raat satata hai ek KHayal 'jamal'

karega kaun sitare shumar kya malum