hui tazlil-e-hunar ba-hunron ke hote

huī tazlīl-e-hunar bā-hunroñ ke hote

naġhma be-rabt huā naġhma-garoñ ke hote

kisī aaseb kā saaya hai yaqīnan varna

dar-ba-dar phirte na ham apne gharoñ ke hote

ye ġhanīmat hai ki kuchh ahl-e-nazar baaqī haiñ

ham hadaf varna yahāñ kam-nazroñ ke hote

ishq par kaisā kaḌā vaqt paḌā hai yaaro

shahr vīrān hai āshufta-saroñ ke hote

girte paḌte sabhī manzil pe pahuñch to jaate

kaash dhoke meñ na ham rāhbaroñ ke hote

koī iisā nazar aa jaa.e to us se pūchhūñ

log mar jaate haiñ kyoñ chāragaroñ ke hote

ham hī se ho na sakī mad.h-sarā.ī un kī

varna manzūr-e-nazar tājvaroñ ke hote

jaane kis ḳhauf se simTe hue baiThe haiñ tuyūr

uḌ nahīñ paate nasheman se paroñ ke hote

ek gardish hī meñ ab tak to bikhar bhī jaate

ham agar dast-e-nigar kūza-garoñ ke hote

sochtā huuñ na ho manzil kā tilism-e-nairang

raah kyoñ miltī nahīñ rāhbaroñ ke hote

jaane kyā ho gayā qismat ko hamārī yā-rab

kuchh nazar aatā nahīñ dīda-varoñ ke hote

ham se aurāq-e-tavārīḳh ye karte haiñ savāl

kaise be-nām hue nām-varoñ ke hote

lutf to jab thā ki rūdād-e-safar meñ 'vāsil'

tazkire thoḌe bahut ham-safaroñ ke hote

hui tazlil-e-hunar ba-hunron ke hote

naghma be-rabt hua naghma-garon ke hote

kisi aaseb ka saya hai yaqinan warna

dar-ba-dar phirte na hum apne gharon ke hote

ye ghanimat hai ki kuchh ahl-e-nazar baqi hain

hum hadaf warna yahan kam-nazron ke hote

ishq par kaisa kaDa waqt paDa hai yaro

shahr viran hai aashufta-saron ke hote

girte paDte sabhi manzil pe pahunch to jate

kash dhoke mein na hum rahbaron ke hote

koi isa nazar aa jae to us se puchhun

log mar jate hain kyon chaaragaron ke hote

hum hi se ho na saki madh-sarai un ki

warna manzur-e-nazar tajwaron ke hote

jaane kis KHauf se simTe hue baiThe hain tuyur

uD nahin pate nasheman se paron ke hote

ek gardish hi mein ab tak to bikhar bhi jate

hum agar dast-e-nigar kuza-garon ke hote

sochta hun na ho manzil ka tilism-e-nairang

rah kyon milti nahin rahbaron ke hote

jaane kya ho gaya qismat ko hamari ya-rab

kuchh nazar aata nahin dida-waron ke hote

hum se auraq-e-tawariKH ye karte hain sawal

kaise be-nam hue nam-waron ke hote

lutf to jab tha ki rudad-e-safar mein 'wasil'

tazkire thoDe bahut ham-safaron ke hote