hui ya mujhse nafrat ya kuchh is mein kibr-o-naz aaya

huī yā mujh se nafrat yā kuchh is meñ kibr-o-nāz aayā

kabhī vo muskurā detā thā ab is se bhī baaz aayā

nayā fitna jo niklā koī to ta.alīm dilvāne

zamāna le ke us ko pesh-e-chashm-e-fitna-sāz aayā

badaltī rahtī hai har dam mirī shakl is qadar ġham se

gayā jab maiñ to samjhā vo nayā ik ishq-bāz aayā

huī dil kī ḳhabar dil ko ki vo bad-zan huā varna

na Tapke ashk āñkhoñ se na muñh tak harf-e-rāz aayā

bachāyā dard se majbūr kar ke tark-e-ulfat par

vo aayā dil-shikan ban kar to goyā dil-navāz aayā

tire hāthoñ shikast-e-dil meñ lutf-e-dil-navāzī hai

ye kyā kam hai ki pahlū tak tirā dast-e-darāz aayā

magar taaza sitam ko vo mirī sehat kā ḳhvāhāñ hai

ki kal zaḳhmī kiyā aur aaj ban kar chārasāz aayā

ġhubār-e-rāh ne āñkheñ milāne diiñ na dil bhar ke

vo mere ghar jo aayā le ke chashm-e-nīm-bāz aayā

huā hai 'shauq' mai-ḳhāne meñ dāḳhil kis takalluf se

bichhāne ke liye masjid se le kar jā-namāz aayā

hui ya mujh se nafrat ya kuchh is mein kibr-o-naz aaya

kabhi wo muskura deta tha ab is se bhi baz aaya

naya fitna jo nikla koi to talim dilwane

zamana le ke us ko pesh-e-chashm-e-fitna-saz aaya

badalti rahti hai har dam meri shakl is qadar gham se

gaya jab main to samjha wo naya ek ishq-baz aaya

hui dil ki KHabar dil ko ki wo bad-zan hua warna

na Tapke ashk aankhon se na munh tak harf-e-raaz aaya

bachaya dard se majbur kar ke tark-e-ulfat par

wo aaya dil-shikan ban kar to goya dil-nawaz aaya

tere hathon shikast-e-dil mein lutf-e-dil-nawazi hai

ye kya kam hai ki pahlu tak tera dast-e-daraaz aaya

magar taza sitam ko wo meri sehat ka KHwahan hai

ki kal zaKHmi kiya aur aaj ban kar chaarasaz aaya

ghubar-e-rah ne aankhen milane din na dil bhar ke

wo mere ghar jo aaya le ke chashm-e-nim-baz aaya

hua hai 'shauq' mai-KHane mein daKHil kis takalluf se

bichhane ke liye masjid se le kar ja-namaz aaya