hujum-e-be-KHudi mein gham ki taswiren nazar aain

hujūm-e-be-ḳhudī meñ ġham kī tasvīreñ nazar aa.iiñ

mujhe shīshe meñ jab rindoñ kī taqdīreñ nazar aa.iiñ

mire zehn-e-rasā ne jazb kar liiñ hausla pā kar

ruḳh-e-gul par mashiyyat kī jo tahrīreñ nazar aa.iiñ

dar-e-zindāñ se chhuT kar bhī vahī hai silsila ya.anī

ki ik zanjīr TuuTī laakh zanjīreñ nazar aa.iiñ

chaman vaale jinheñ jān-e-chaman kahte the vo kaliyāñ

mujhe to dāġh-hā-e-dil kī tasvīreñ nazar aa.iiñ

na jaane kitne parde darmiyāñ haa.il rahe lekin

shab-e-va.ada tasavvur meñ vo tanvīreñ nazar aa.iiñ

vahīñ par himmat-e-insāniyat ne saañs toḌā hai

jahāñ taqdīr se mar.ūb tadbīreñ nazar aa.iiñ

koī afsāna samjhe yā bayān-e-vāqi.a samjhe

mujhe ik ḳhvāb-e-nādīda kī ta.abīreñ nazar aa.iiñ

vo insāñ ḳhud-shanāsā-e-rumūz-e-dil nahīñ 'maikash'

ki jis ko zarf-e-rindāna meñ taqsīreñ nazar aa.iiñ

hujum-e-be-KHudi mein gham ki taswiren nazar aain

mujhe shishe mein jab rindon ki taqdiren nazar aain

mere zehn-e-rasa ne jazb kar lin hausla pa kar

ruKH-e-gul par mashiyyat ki jo tahriren nazar aain

dar-e-zindan se chhuT kar bhi wahi hai silsila yani

ki ek zanjir TuTi lakh zanjiren nazar aain

chaman wale jinhen jaan-e-chaman kahte the wo kaliyan

mujhe to dagh-ha-e-dil ki taswiren nazar aain

na jaane kitne parde darmiyan hail rahe lekin

shab-e-wada tasawwur mein wo tanwiren nazar aain

wahin par himmat-e-insaniyat ne sans toDa hai

jahan taqdir se marub tadbiren nazar aain

koi afsana samjhe ya bayan-e-waqia samjhe

mujhe ek KHwab-e-nadida ki tabiren nazar aain

wo insan KHud-shanasa-e-rumuz-e-dil nahin 'maikash'

ki jis ko zarf-e-rindana mein taqsiren nazar aain