hujum-e-gham ko hum to zist ka hasil samajhte hain

hujūm-e-ġham ko ham to ziist kā hāsil samajhte haiñ

ye alfāz-e-digar tūfān ko sāhil samajhte haiñ

rah-e-ulfat meñ aise bhī maqām aa jaate haiñ aksar

jahāñ āh-o-fuġhāñ ko ham sukūn-e-dil samajhte haiñ

asīrān-e-qafas kī himmat-e-mardāna to dekho

qafas kī qaid ko āzādi-e-kāmil samajhte haiñ

vo kyā pahuñcheñge manzil par vo kyā pā.eñge manzil ko

jo rahzan ko bhī apnā rahbar-e-kāmil samajhte haiñ

unheñ parvā-e-jor-e-charḳhe--gardūñ ho nahīñ saktī

jo ranj-o-ġham ko bhī vaj.h-e-sukūn-e-dil samajhte haiñ

kahāñ maiñ aur kahāñ sher-o-suḳhan kī anjuman 'paikāñ'

ba-faiz-e-tab.a-e-mauzūñ hai jo ahl-e-dil samajhte haiñ

hujum-e-gham ko hum to zist ka hasil samajhte hain

ye alfaz-e-digar tufan ko sahil samajhte hain

rah-e-ulfat mein aise bhi maqam aa jate hain aksar

jahan aah-o-fughan ko hum sukun-e-dil samajhte hain

asiran-e-qafas ki himmat-e-mardana to dekho

qafas ki qaid ko aazadi-e-kaamil samajhte hain

wo kya pahunchenge manzil par wo kya paenge manzil ko

jo rahzan ko bhi apna rahbar-e-kaamil samajhte hain

unhen parwa-e-jor-e-charKHe--gardun ho nahin sakti

jo ranj-o-gham ko bhi wajh-e-sukun-e-dil samajhte hain

kahan main aur kahan sher-o-suKHan ki anjuman 'paikan'

ba-faiz-e-taba-e-mauzun hai jo ahl-e-dil samajhte hain