hukumat hai na shaukat hai na izzat hai na daulat hai

hukūmat hai na shaukat hai na 'izzat hai na daulat hai

hamāre paas ab le de ke baaqī bas saqāfat hai

gine jaate haiñ jo dahlīz ke bujhte charāġhoñ meñ

unheñ aivān kī mehrāb meñ jalne kī 'ādat hai

chalo ḳhairāt na miltī koī khiḌkī hī khul jaatī

faqīroñ ko mahalle se bas itnī sī shikāyat hai

bharam donoñ kā qaa.em hai adā-e-be-niyāzī se

zamāna pūchhtā kab hai hamārī kyā zarūrat hai

kisī manzil pe ham ko mustaqil rahne nahīñ detā

na jaane vaqt ko ham be-gharoñ se kyā shikāyat hai

zabāñ-bandī to pahle thī ba-hukm-e-sāhab-e-'ālam

nigāhoñ ko bhī ab ḳhāmosh rahne kī hidāyat hai

hukumat hai na shaukat hai na 'izzat hai na daulat hai

hamare pas ab le de ke baqi bas saqafat hai

gine jate hain jo dahliz ke bujhte charaghon mein

unhen aiwan ki mehrab mein jalne ki 'adat hai

chalo KHairaat na milti koi khiDki hi khul jati

faqiron ko mahalle se bas itni si shikayat hai

bharam donon ka qaem hai ada-e-be-niyazi se

zamana puchhta kab hai hamari kya zarurat hai

kisi manzil pe hum ko mustaqil rahne nahin deta

na jaane waqt ko hum be-gharon se kya shikayat hai

zaban-bandi to pahle thi ba-hukm-e-sahab-e-'alam

nigahon ko bhi ab KHamosh rahne ki hidayat hai