hunar-mandi se jine ka hunar ab tak nahin aaya

hunar-mandī se jiine kā hunar ab tak nahīñ aayā

safar karte rahe tarz-e-safar ab tak nahīñ aayā

ġhalat hai tere ashkoñ meñ asar ab tak nahīñ aayā

tujhe ronā ai merī chashm-e-tar ab tak nahīñ aayā

hazāroñ falsafī qabza kiye baiThe haiñ zehnoñ par

mire qaabū meñ yā-rab merā sar ab tak nahīñ aayā

paḌā rahtā hai har dam ḳhauf kā saaya rag-e-jāñ par

koī be-ḳhauf lamha be-ḳhatar ab tak nahīñ aayā

hamāre sar pe hai sāya-fagan ummīd kā sūraj

hamārī raah meñ koī shajar ab tak nahīñ aayā

hameñ to qāfiya-paimā.ī karnā bhī nahīñ aatā

baḌā fan hai jo aa jaatā magar ab tak nahīñ aayā

vo kahte haiñ duā.eñ bā-asar hotī haiñ 'ḳhālid' kī

maiñ kahtā huuñ koī zer-e-asar ab tak nahīñ aayā

hunar-mandi se jine ka hunar ab tak nahin aaya

safar karte rahe tarz-e-safar ab tak nahin aaya

ghalat hai tere ashkon mein asar ab tak nahin aaya

tujhe rona ai meri chashm-e-tar ab tak nahin aaya

hazaron falsafi qabza kiye baiThe hain zehnon par

mere qabu mein ya-rab mera sar ab tak nahin aaya

paDa rahta hai har dam KHauf ka saya rag-e-jaan par

koi be-KHauf lamha be-KHatar ab tak nahin aaya

hamare sar pe hai saya-fagan ummid ka suraj

hamari rah mein koi shajar ab tak nahin aaya

hamein to qafiya-paimai karna bhi nahin aata

baDa fan hai jo aa jata magar ab tak nahin aaya

wo kahte hain duaen ba-asar hoti hain 'KHalid' ki

main kahta hun koi zer-e-asar ab tak nahin aaya