huruf arz talab ki surat guzarte lamhon ka KHwab likhna

hurūf arz talab kī sūrat guzarte lamhoñ kā ḳhvāb likhnā

hamārī āñkhoñ ke sāmne hī hamāre dil kī kitāb likhnā

kisī kī nazroñ kī narm bārish se jab bhī bhīge badan kī miTTī

sulagtī sāñsoñ ke pairahan par hadīs-e-husn-o-shabāb likhnā

hamāre hoñToñ kī tishna-kāmī tumhārī āñkhoñ se jab bhī lapke

kahīñ ye titlī kahīñ pe ġhuncha kahīñ shagufta gulāb likhnā

kabhī haqīqat se khel lenā kabhī ulajhnā majāz se tum

kabhī kisī se karam kī ḳhvāhish kabhī kisī se azaab likhnā

mujhe tum itnī bulandiyoñ par na laao ki maiñ ḳhudā nahīñ huuñ

mirī haqīqat ke hāshiye meñ mire fasāne kā baab likhnā

tum apne jiite gharoñ meñ apne gharoñ kī sāzish bhī karnā shāmil

ukhaḌte ḳhemoñ kī qīmatoñ meñ 'asad' fareb-e-tanāb likhnā

huruf arz talab ki surat guzarte lamhon ka KHwab likhna

hamari aankhon ke samne hi hamare dil ki kitab likhna

kisi ki nazron ki narm barish se jab bhi bhige badan ki miTTi

sulagti sanson ke pairahan par hadis-e-husn-o-shabab likhna

hamare honTon ki tishna-kaami tumhaari aankhon se jab bhi lapke

kahin ye titli kahin pe ghuncha kahin shagufta gulab likhna

kabhi haqiqat se khel lena kabhi ulajhna majaz se tum

kabhi kisi se karam ki KHwahish kabhi kisi se azab likhna

mujhe tum itni bulandiyon par na lao ki main KHuda nahin hun

meri haqiqat ke hashiye mein mere fasane ka bab likhna

tum apne jite gharon mein apne gharon ki sazish bhi karna shamil

ukhaDte KHemon ki qimaton mein 'asad' fareb-e-tanab likhna