husn achchha hai mohammad ka kamal achchha hai

husn achchhā hai mohammad kā kamāl achchhā hai

jo ḳhudā ko bhī hai pyārā vo jamāl achchhā hai

bazm-e-kaunain murattab huī terī ḳhātir

vaqt hai tere liye is meñ jo maal achchhā hai

mujh se pūchhe to koī tere ġhulāmoñ kā uruuj

bādshāhoñ se bhī rutbe meñ bilāl achchhā hai

ġham uThāne kī hai aadat mirī tab-e-sānī

maiñ to kahtā huuñ ki duniyā meñ malāl achchhā hai

qissa-e-tūr se vāqif hai zamāna saarā

koī kis muñh se kahe shauq-e-jamāl achchhā hai

bazm meñ dekh ke hasrat se kisī ko chup huuñ

dar-haqīqat yahī andāz-e-savāl achchhā hai

jis meñ ik din bhī mayassar ho mulāqāt kī raat

mere nazdīk to vo maah vo saal achchhā hai

lutf detā hai mujhe terā tasavvur shab-e-ġham

sach kahā karte haiñ achchhoñ kā ḳhayāl achchhā hai

jab se dekhe haiñ tumhāre lab-o-abrū ham ne

na kahā hai na kaheñge ki hilāl achchhā hai

tujh se haT kar kahīñ paḌtī hī nahīñ merī nazar

yuuñ to yūsuf kā bhī hone ko jamāl achchhā hai

āshiqoñ ke liye kis kaam kā hai sabr-o-qarār

jo tire ġham meñ rahe muztarib-e-hāl achchhā hai

us ne dekhā hī nahīñ qāmat-e-zebā terā

jo ye kahtā ho ki gulshan meñ nihāl achchhā hai

phir vahī zikr hai arbāb-e-karam kā 'rāsiḳh'

ham samajhte haiñ ye andāz-e-savāl achchhā hai

husn achchha hai mohammad ka kamal achchha hai

jo KHuda ko bhi hai pyara wo jamal achchha hai

bazm-e-kaunain murattab hui teri KHatir

waqt hai tere liye is mein jo mal achchha hai

mujh se puchhe to koi tere ghulamon ka uruj

baadshahon se bhi rutbe mein bilal achchha hai

gham uThane ki hai aadat meri tab-e-sani

main to kahta hun ki duniya mein malal achchha hai

qissa-e-tur se waqif hai zamana sara

koi kis munh se kahe shauq-e-jamal achchha hai

bazm mein dekh ke hasrat se kisi ko chup hun

dar-haqiqat yahi andaz-e-sawal achchha hai

jis mein ek din bhi mayassar ho mulaqat ki raat

mere nazdik to wo mah wo sal achchha hai

lutf deta hai mujhe tera tasawwur shab-e-gham

sach kaha karte hain achchhon ka KHayal achchha hai

jab se dekhe hain tumhaare lab-o-abru hum ne

na kaha hai na kahenge ki hilal achchha hai

tujh se haT kar kahin paDti hi nahin meri nazar

yun to yusuf ka bhi hone ko jamal achchha hai

aashiqon ke liye kis kaam ka hai sabr-o-qarar

jo tere gham mein rahe muztarib-e-haal achchha hai

us ne dekha hi nahin qamat-e-zeba tera

jo ye kahta ho ki gulshan mein nihaal achchha hai

phir wahi zikr hai arbab-e-karam ka 'rasiKH'

hum samajhte hain ye andaz-e-sawal achchha hai