husn aur ishq ko farq-e-nazari kyun kahiye

husn aur ishq ko farq-e-nazarī kyuuñ kahiye

mai kī tāsīr ko ik be-ḳhabarī kyuuñ kahiye

har-nafas ziist kā ho jaa.e agar vaqf-e-talāsh

justujū kahiye use dar-badarī kyuuñ kahiye

koh-o-sahrā hī nahīñ arsh kī laatā huuñ ḳhabar

merī parvāz ko be-bāl-o-parī kyuuñ kahiye

kashtiyāñ Duub ke ubhreñ jo kisī tūfāñ meñ

nā-ḳhudāoñ kī use dīda-varī kyuuñ kahiye

bujhte bujhte bhī añdheroñ kī rahe jo dushman

aisī hastī ko charāġh-e-saharī kyuuñ kahiye

jab sulajhtī na ho koshish se bhī uljhī huī baat

phir to hālāt ko aafat se barī kyuuñ kahiye

ek koshish thī jo nākām rahī qismat se

'asr' kuchh kahiye use be-hunarī kyuuñ kahiye

husn aur ishq ko farq-e-nazari kyun kahiye

mai ki tasir ko ek be-KHabari kyun kahiye

har-nafas zist ka ho jae agar waqf-e-talash

justuju kahiye use dar-badari kyun kahiye

koh-o-sahra hi nahin arsh ki lata hun KHabar

meri parwaz ko be-baal-o-pari kyun kahiye

kashtiyan Dub ke ubhren jo kisi tufan mein

na-KHudaon ki use dida-wari kyun kahiye

bujhte bujhte bhi andheron ki rahe jo dushman

aisi hasti ko charagh-e-sahari kyun kahiye

jab sulajhti na ho koshish se bhi uljhi hui baat

phir to haalat ko aafat se bari kyun kahiye

ek koshish thi jo nakaam rahi qismat se

'asr' kuchh kahiye use be-hunari kyun kahiye