husn-e-bazar to hai garmi-e-bazar nahin

husn-e-bāzār to hai garmī-e-bāzār nahīñ

bechne vaale haiñ sab koī ḳharīdār nahīñ

aao batlā.eñ ki va.adoñ kī haqīqat kyā hai

peḌ ūñche haiñ sabhī koī samar-dār nahīñ

dil kī uftād mizājī se pareshāñ huuñ maiñ

thī talab jis kī ab us kā hī talabgār nahīñ

ab jise dekho vahī ghuum rahā hai bāñdhe

dastiyāb ab kisī dūkān pe dastār nahīñ

ai zuleḳhā tū ne jo daam lagāyā ab ke

us pe yūsuf to koī bikne ko tayyār nahīñ

āsmāñ chhat hai zamīñ farsh kushāda hai makāñ

merā ghar vo hai ki jis ke dar-o-dīvār nahīñ

hai suḳhan-fahmī kā har shaḳhs ko da.avā lekin

kaun aisā hai jo 'ġhālib' kā taraf-dār nahīñ

ai 'kamāl' aise meñ kyā lutf-e-safar pāoge

raah meñ dhuup nahīñ sañg nahīñ ḳhaar nahīñ

husn-e-bazar to hai garmi-e-bazar nahin

bechne wale hain sab koi KHaridar nahin

aao batlaen ki wadon ki haqiqat kya hai

peD unche hain sabhi koi samar-dar nahin

dil ki uftad mizaji se pareshan hun main

thi talab jis ki ab us ka hi talabgar nahin

ab jise dekho wahi ghum raha hai bandhe

dastiyab ab kisi dukan pe dastar nahin

ai zuleKHa tu ne jo dam lagaya ab ke

us pe yusuf to koi bikne ko tayyar nahin

aasman chhat hai zamin farsh kushada hai makan

mera ghar wo hai ki jis ke dar-o-diwar nahin

hai suKHan-fahmi ka har shaKHs ko dawa lekin

kaun aisa hai jo 'ghaalib' ka taraf-dar nahin

ai 'kamal' aise mein kya lutf-e-safar paoge

rah mein dhup nahin sang nahin KHar nahin