husn-e-farogh-e-shab hai zaKHm-e-jigar hamara

husn-e-faroġh-e-shab hai zaḳhm-e-jigar hamārā

har-chand muntazir hai bām-e-sahar hamārā

ahbāb ko mubārak ye shauq tīrgī kā

hai zauq raushnī kā zād-e-safar hamārā

kyuuñ bā.is-e-alam hoñ ye ḳhūñ-chakāñ jabīneñ

thā ibtidā se dushman vo sañg-e-dar hamārā

karte jo ham kinārā us dānish-o-hunar se

ishrat-garoñ meñ hotā shāyad guzar hamārā

parvarda-e-havas jo husn-e-yaqīñ bhī hotā

ye karbalā-e-daurāñ hotā na ghar hamārā

kyā kyā hai naaz ham ko is baḳht-e-nā-rasā par

sidq-o-safā se rishta hai mo'atabar hamārā

dekheñ 'sarosh' vo bhī is manzar-e-hasīñ ko

jalvoñ kī aabrū hai zaḳhm-e-jigar hamārā

husn-e-farogh-e-shab hai zaKHm-e-jigar hamara

har-chand muntazir hai baam-e-sahar hamara

ahbab ko mubarak ye shauq tirgi ka

hai zauq raushni ka zad-e-safar hamara

kyun bais-e-alam hon ye KHun-chakan jabinen

tha ibtida se dushman wo sang-e-dar hamara

karte jo hum kinara us danish-o-hunar se

ishrat-garon mein hota shayad guzar hamara

parwarda-e-hawas jo husn-e-yaqin bhi hota

ye karbala-e-dauran hota na ghar hamara

kya kya hai naz hum ko is baKHt-e-na-rasa par

sidq-o-safa se rishta hai mo'atabar hamara

dekhen 'sarosh' wo bhi is manzar-e-hasin ko

jalwon ki aabru hai zaKHm-e-jigar hamara