husn-e-jaanan ki qayamat hai uThae rakkhe

husn-e-jānāñ ki qayāmat hai uThā.e rakkhe

shahr ke shahr ko dīvāna banā.e rakkhe

ek vo shaḳhs yahāñ thā to baḌī raunaq thī

kaun is shahr meñ ab sham'eñ jalā.e rakkhe

dil pareshāñ thā magar jaan tumhārī ḳhātir

chehra shādāb rakhā baal banā.e rakkhe

hijr meñ haal se behāl hue haiñ ḳhud hī

kis meñ himmat hai ki kamre ko sajā.e rakkhe

dil-e-nādāñ ko 'ajab kaam diyā qudrat ne

ḳhāna-e-jāñ meñ sadā shor machā.e rakkhe

vo jo ojhal hai nigāhoñ se magar dil meñ hai

gar vo chāhe to mirī baat banā.e rakkhe

sheva-e-husn to inkār hī Thahrā 'nāsir'

'ishq ko chāhiye ummīd lagā.e rakkhe

husn-e-jaanan ki qayamat hai uThae rakkhe

shahr ke shahr ko diwana banae rakkhe

ek wo shaKHs yahan tha to baDi raunaq thi

kaun is shahr mein ab sham'en jalae rakkhe

dil pareshan tha magar jaan tumhaari KHatir

chehra shadab rakha baal banae rakkhe

hijr mein haal se behaal hue hain KHud hi

kis mein himmat hai ki kamre ko sajae rakkhe

dil-e-nadan ko 'ajab kaam diya qudrat ne

KHana-e-jaan mein sada shor machae rakkhe

wo jo ojhal hai nigahon se magar dil mein hai

gar wo chahe to meri baat banae rakkhe

shewa-e-husn to inkar hi Thahra 'nasir'

'ishq ko chahiye ummid lagae rakkhe