husn-e-KHud-bin ka ishaara mujhe malum na tha

husn-e-ḳhud-bīñ kā ishāra mujhe ma.alūm na thā

un kī āñkhoñ meñ hai shikva mujhe ma.alūm na thā

ab sivā marsiya-e-kam-nigahī kyā kahiye

sāmne thā mire jalva mujhe ma.alūm na thā

mujh ko shikva nahīñ kuchh ātish-e-gul se lekin

āshiyāñ yuuñ bhī jalegā mujhe ma.alūm na thā

gum huī gesū-e-jānāñ kī siyāhī is meñ

itnī tārīk hai duniyā mujhe ma.alūm na thā

ḳhūn-e-dil jis ke liye sarf kiyā hai maiñ ne

vo hai tārīk ujālā mujhe ma.alūm na thā

duur tak naqsh-e-qadam hai na nishān-e-sajda

maiñ huuñ is raah meñ tanhā mujhe ma.alūm na thā

maiñ ġham-e-ahd-e-ta.alluq ko bhulā baiThā thā

dil kā har zaḳhm hai taaza mujhe ma.alūm na thā

dekh kar husn kā utrā huā chehra gum huuñ

un kā ye haal bhī hogā mujhe ma.alūm na thā

aur bhī kuchh dar-e-zindāñ se nikalte hī 'vafā'

saḳht ho jā.egā pahra mujhe ma.alūm na thā

husn-e-KHud-bin ka ishaara mujhe malum na tha

un ki aankhon mein hai shikwa mujhe malum na tha

ab siwa marsiya-e-kam-nigahi kya kahiye

samne tha mere jalwa mujhe malum na tha

mujh ko shikwa nahin kuchh aatish-e-gul se lekin

aashiyan yun bhi jalega mujhe malum na tha

gum hui gesu-e-jaanan ki siyahi is mein

itni tarik hai duniya mujhe malum na tha

KHun-e-dil jis ke liye sarf kiya hai main ne

wo hai tarik ujala mujhe malum na tha

dur tak naqsh-e-qadam hai na nishan-e-sajda

main hun is rah mein tanha mujhe malum na tha

main gham-e-ahd-e-talluq ko bhula baiTha tha

dil ka har zaKHm hai taza mujhe malum na tha

dekh kar husn ka utra hua chehra gum hun

un ka ye haal bhi hoga mujhe malum na tha

aur bhi kuchh dar-e-zindan se nikalte hi 'wafa'

saKHt ho jaega pahra mujhe malum na tha