husn-e-muKHtar sahi ishq bhi majbur nahin

husn-e-muḳhtār sahī ishq bhī majbūr nahīñ

ye jafāoñ pe jafā ab mujhe manzūr nahīñ

zulf-e-zanjīr sahī dil bhī giraftār magar

maiñ tire halqa-e-ādāb kā mahsūr nahīñ

dil kā saudā hai jo paT jaa.e to behtar varna

maiñ bhī majbūr nahīñ aap bhī majbūr nahīñ

dāman-e-dil se ye begāna-ravī itnā gurez

tum to ik phuul ho kāñToñ kā bhī dastūr nahīñ

chand jaam aur ki maiḳhāna-e-jāñ tak pahuñcheñ

DhūñDne vaale mujhe mujh se bahut duur nahīñ

sab libāsoñ meñ haiñ poshīda gunāhoñ kī tarah

dil-e-bebāk bhī mahfil ke ta.iiñ aur nahīñ

har suḳhan hosh kā hai muftī-e-hairān ke saath

sab piye baiThe haiñ aur koī bhī maḳhmūr nahīñ

sab rasan-basta-e-āzādī-e-īmān hue

ab koī mere sivā banda-e-majbūr nahīñ

us se mil kar bhī udaas us kī judā.ī bhī garāñ

dil ba-har-hāl kisī taur bhī masrūr nahīñ

husn-e-muKHtar sahi ishq bhi majbur nahin

ye jafaon pe jafa ab mujhe manzur nahin

zulf-e-zanjir sahi dil bhi giraftar magar

main tere halqa-e-adab ka mahsur nahin

dil ka sauda hai jo paT jae to behtar warna

main bhi majbur nahin aap bhi majbur nahin

daman-e-dil se ye begana-rawi itna gurez

tum to ek phul ho kanTon ka bhi dastur nahin

chand jam aur ki maiKHana-e-jaan tak pahunchen

DhunDne wale mujhe mujh se bahut dur nahin

sab libason mein hain poshida gunahon ki tarah

dil-e-bebak bhi mahfil ke tain aur nahin

har suKHan hosh ka hai mufti-e-hairan ke sath

sab piye baiThe hain aur koi bhi maKHmur nahin

sab rasan-basta-e-azadi-e-iman hue

ab koi mere siwa banda-e-majbur nahin

us se mil kar bhi udas us ki judai bhi garan

dil ba-har-haal kisi taur bhi masrur nahin