husn-e-na-mumkin ko honTon ne chhua phir kya hua

husn-e-na-mumkin ko hoñToñ ne chhuā phir kyā huā

apnī be-rabtī pe dil uljhā rahā phir kyā huā

raat din milte rahe aflāk ke saa.e tale

raat aur din meñ vahī parda rahā phir kyā huā

jhuuT ko sach par fazīlat hī rahī barsoñ ke baad

dūsroñ ne sach ko bhī sachchā kahā phir kyā huā

garm thā bāzār-e-hastī sau jatan ke bāvajūd

ruuh kā yā jism kā saudā huā phir kyā huā

aaj us ko ho na ho raste meñ milnā hai zarūr

raat us ne ḳhvāb meñ parda kiyā phir kyā huā

umr bhar chaltī rahī duniyā-e-hijrāñ par dhanak

jāgtī āñkhoñ meñ ik sapnā rahā phir kyā huā

un ko ab merī kahānī meñ ye dilchaspī hai kyoñ

haañ mujhe is daur ne Thukrā diyā phir kyā huā

phal gire patte gire aa.ī ga.ī fasl-e-bahār

sab ne pūchhā kyā huā dil ne kahā phir kyā huā

husn-e-na-mumkin ko honTon ne chhua phir kya hua

apni be-rabti pe dil uljha raha phir kya hua

raat din milte rahe aflak ke sae tale

raat aur din mein wahi parda raha phir kya hua

jhuT ko sach par fazilat hi rahi barson ke baad

dusron ne sach ko bhi sachcha kaha phir kya hua

garm tha bazar-e-hasti sau jatan ke bawajud

ruh ka ya jism ka sauda hua phir kya hua

aaj us ko ho na ho raste mein milna hai zarur

raat us ne KHwab mein parda kiya phir kya hua

umr bhar chalti rahi duniya-e-hijran par dhanak

jagti aankhon mein ek sapna raha phir kya hua

un ko ab meri kahani mein ye dilchaspi hai kyon

han mujhe is daur ne Thukra diya phir kya hua

phal gire patte gire aai gai fasl-e-bahaar

sab ne puchha kya hua dil ne kaha phir kya hua