husn jazib-nazar na ho jae

husn jāzib-nazar na ho jaa.e

haal dil kā digar na ho jaa.e

Dar lagā hai mujhe raqīboñ se

rāz-e-dil kī ḳhabar na ho jaa.e

khul na jaa.e ye rāz-e-ishq kahīñ

zindagī dard-e-sar na ho jaa.e

vasl-e-gul kī isī tamanna meñ

zindagānī basar na ho jaa.e

jān-e-jāñ intizār meñ tere

shaam apnī sahar na ho jaa.e

dil ko dhaḌkā hai terī mahfil meñ

ġhair kā bhī guzar na ho jaa.e

ḳhvāb-e-rāhat harām hai apnā

dāna-pānī zahr na ho jaa.e

ḳhauf hai un ke is taġhāful se

ḳhuun apnā jigar na ho jaa.e

kyā ajab hai vufūr-e-ġham se ab

naala phir bā-asar na ho jaa.e

ai havas tere paas rahne se

dāman-e-pāk tar na ho jaa.e

ḳhāmushī se tumhārī ai 'ahqar'

bad-gumāñ nāma-bar na ho jaa.e

husn jazib-nazar na ho jae

haal dil ka digar na ho jae

Dar laga hai mujhe raqibon se

raaz-e-dil ki KHabar na ho jae

khul na jae ye raaz-e-ishq kahin

zindagi dard-e-sar na ho jae

wasl-e-gul ki isi tamanna mein

zindagani basar na ho jae

jaan-e-jaan intizar mein tere

sham apni sahar na ho jae

dil ko dhaDka hai teri mahfil mein

ghair ka bhi guzar na ho jae

KHwab-e-rahat haram hai apna

dana-pani zahr na ho jae

KHauf hai un ke is taghaful se

KHun apna jigar na ho jae

kya ajab hai wufur-e-gham se ab

nala phir ba-asar na ho jae

ai hawas tere pas rahne se

daman-e-pak tar na ho jae

KHamushi se tumhaari ai 'ahqar'

bad-guman nama-bar na ho jae