husn jab qatil na tha aur ishq diwana na tha

husn jab qātil na thā aur ishq dīvāna na thā

zindagī meñ dard-o-ġham kā koī afsāna na thā

sab se vo kahtā phirā maiñ hī thā us kā āshnā

sāmne aayā to us ne mujh ko pahchānā na thā

rāt-bhar kuchh āhaTeñ dil kī taraf aatī rahīñ

ham the jis ke muntazir us ko magar aanā na thā

ek sahmī sī tamannā ek mub.ham sā ḳhayāl

is se baḌh kar mere dil meñ koī nazrāna na thā

dekhiye kis samt ab ke le chale āvārgī

dasht aisā kaun sā thā ham ne jo chhānā na thā

sho.ala-e-ġham jal uThā to bujh ga.e saare charāġh

ātish-e-dil gul huī to koī parvāna na thā

husn jab qatil na tha aur ishq diwana na tha

zindagi mein dard-o-gham ka koi afsana na tha

sab se wo kahta phira main hi tha us ka aashna

samne aaya to us ne mujh ko pahchana na tha

raat-bhar kuchh aahaTen dil ki taraf aati rahin

hum the jis ke muntazir us ko magar aana na tha

ek sahmi si tamanna ek mubham sa KHayal

is se baDh kar mere dil mein koi nazrana na tha

dekhiye kis samt ab ke le chale aawargi

dasht aisa kaun sa tha hum ne jo chhana na tha

shoala-e-gham jal uTha to bujh gae sare charagh

aatish-e-dil gul hui to koi parwana na tha