husn ke ghamze bhi dekhe hain sitam dekhe hain

husn ke ġhamze bhī dekhe haiñ sitam dekhe haiñ

dil pe jo kuchh bhī hue haiñ vo karam dekhe haiñ

ahl-e-dil ne jinheñ āsār-e-qayāmat samjhā

ham ne āñkhoñ se vahī naqsh-e-qadam dekhe haiñ

apne hī pūjne vāloñ ko jo dete haiñ sazā

ma.abad-e-ishq meñ aise bhī sanam dekhe haiñ

tujh ko ma.alūm nahīñ gardish-e-daurāñ ham ne

ba.az-auqāt qayāmat ke qadam dekhe haiñ

un kī mastāna-ḳhirāmī ke jilau meñ ham ne

aish dekhe haiñ kabhī aur kabhī ġham dekhe haiñ

kyā mohabbat ke haqā.eq kā pata deñ tum ko

jazba-e-shauq se ubhre to alam dekhe haiñ

marzī-e-dost pe 'bāsit' jo miTā deñ ḳhud ko

aise jāñbāz zarā ham ne bhī kam dekhe haiñ

husn ke ghamze bhi dekhe hain sitam dekhe hain

dil pe jo kuchh bhi hue hain wo karam dekhe hain

ahl-e-dil ne jinhen aasar-e-qayamat samjha

hum ne aankhon se wahi naqsh-e-qadam dekhe hain

apne hi pujne walon ko jo dete hain saza

mabad-e-ishq mein aise bhi sanam dekhe hain

tujh ko malum nahin gardish-e-dauran hum ne

baz-auqat qayamat ke qadam dekhe hain

un ki mastana-KHirami ke jilau mein hum ne

aish dekhe hain kabhi aur kabhi gham dekhe hain

kya mohabbat ke haqaeq ka pata den tum ko

jazba-e-shauq se ubhre to alam dekhe hain

marzi-e-dost pe 'basit' jo miTa den KHud ko

aise jaanbaz zara hum ne bhi kam dekhe hain