husn ke gun gin sakun ye gun kahan rakhta hun main

husn ke gun gin sakūñ ye gun kahāñ rakhtā huuñ maiñ

lab nahīñ khulte magar zauq-e-bayāñ rakhtā huuñ maiñ

lau jahāñ dī sham.a ne maiñ bhī taḌap kar jal bujhā

fitrat-e-parvāna-e-ātish-ba-jāñ rakhtā huuñ maiñ

phir mire dāman meñ koī phuul khiltā hī nahīñ

jab zarā qaabū meñ chashm-e-ḳhūñ-fishāñ rakhtā huuñ maiñ

be-luTā.e kaT nahīñ saktī matā.a-e-ishq-e-dost

daulat-e-begāna-e-ḳhauf-e-zamāñ rakhtā huuñ maiñ

gulshan-e-jamhūr ho yā jannat-e-mazdūr ho

kuchh alag in se zamīn-o-āsmāñ rakhtā huuñ maiñ

toḌ detā hai tilism-e-har-nizām-e-pur-fareb

dil meñ jo dard-e-kasāñ-o-nā-kasāñ rakhtā huuñ maiñ

ḳhirman-e-bātil unhīñ se hogā 'ārif' sho.ala-rū

fikr kī har mauj meñ vo bijliyāñ rakhtā huuñ maiñ

husn ke gun gin sakun ye gun kahan rakhta hun main

lab nahin khulte magar zauq-e-bayan rakhta hun main

lau jahan di shama ne main bhi taDap kar jal bujha

fitrat-e-parwana-e-atish-ba-jaan rakhta hun main

phir mere daman mein koi phul khilta hi nahin

jab zara qabu mein chashm-e-KHun-fishan rakhta hun main

be-luTae kaT nahin sakti mataa-e-ishq-e-dost

daulat-e-begana-e-KHauf-e-zaman rakhta hun main

gulshan-e-jamhur ho ya jannat-e-mazdur ho

kuchh alag in se zamin-o-asman rakhta hun main

toD deta hai tilism-e-har-nizam-e-pur-fareb

dil mein jo dard-e-kasan-o-na-kasan rakhta hun main

KHirman-e-baatil unhin se hoga 'arif' shoala-ru

fikr ki har mauj mein wo bijliyan rakhta hun main