husn ke waswase se bahar mil

husn ke vasvase se bāhar mil

tū mujhe aa.ine se bāhar mil

rakh bharam kuchh to be-libāsī kā

sharm ke dā.ere se bāhar mil

māvarā nazm kī ho bandish se

tū mujhe qāfiye se bāhar mil

vajd kī kaifiyat meñ chhū mujh ko

hosh ke dā.ere se bāhar mil

pyaar ke raag raag rahne de

ishq ke falsafe se bāhar mil

abr kī jhoñpaḌī se bāhar aa

ret ke qāfile se bāhar mil

khol na tāqche ko ujlat meñ

chain se hausle se bāhar mil

ḳhvāb kī bārgah meñ hāzir ho

niiñd ke zāviye se bāhar mil

khīñch le vaqt kī tanāboñ ko

jism ke fāsle se bāhar mil

kyā kahā jism nochnā hai tujhe

shaam ke hāshiye se bāhar mil

ḳhaak par pheñk de añgūThī ko

ghar ke is faisle se bāhar mil

dekh jā hijr kī musībat meñ

vasl ke hādse se bāhar mil

be-ḳhatar haath thaam 'rāhib' kā

ḳhauf ke silsile se bāhar mil

husn ke waswase se bahar mil

tu mujhe aaine se bahar mil

rakh bharam kuchh to be-libasi ka

sharm ke daere se bahar mil

mawara nazm ki ho bandish se

tu mujhe qafiye se bahar mil

wajd ki kaifiyat mein chhu mujh ko

hosh ke daere se bahar mil

pyar ke rag rag rahne de

ishq ke falsafe se bahar mil

abr ki jhonpaDi se bahar aa

ret ke qafile se bahar mil

khol na taqche ko ujlat mein

chain se hausle se bahar mil

KHwab ki bargah mein hazir ho

nind ke zawiye se bahar mil

khinch le waqt ki tanabon ko

jism ke fasle se bahar mil

kya kaha jism nochna hai tujhe

sham ke hashiye se bahar mil

KHak par phenk de anguThi ko

ghar ke is faisle se bahar mil

dekh ja hijr ki musibat mein

wasl ke hadse se bahar mil

be-KHatar hath tham 'rahib' ka

KHauf ke silsile se bahar mil